Aqtóbede qoǵamdyq tamaqtaný ornynda gaz jabdyǵy jarylyp, bes adam aýrýhanaǵa tústi
AQTÓBE. KAZINFORM — Oqıǵa Hromtaý qalasynyń ortalyǵynda boldy. Dárigerler kúıik shalǵan adamdardyń jaǵdaıy qalypty dep otyr.
Oqıǵa búgin keshki saǵat 17:45–te boldy. Aqtóbe oblysy Hromtaý qalasyndaǵy Ǵ. Jubanova kóshesinde ornalasqan qoǵamdyq tamaqtaný ornynda sý jylytatyn gaz jabdyǵy jaryldy.
— Túsken shaqyrtý boıynsha TJD kúshteri jedel túrde jiberildi. Oqıǵa ornyna eki tehnıka men jeke quramnan jeti adam bardy. Oqıǵa saldarynan ǵımarattyń qurylymy, shamamen 80 sharshy metr aýmaq qırady. Zardap shekkenderge ýaqtyly medıtsınalyq kómek kórsetilip, bes adam aýrýhanaǵa jetkizildi, — dep habarlady oblystyq TJD baspasóz qyzmeti.
Aqtóbe oblystyq densaýlyq saqtaý basqarmasy baspasóz qyzmetiniń habarlaýynsha, zardap shekkenderdi ártúrli dárejede kúıik shalǵan. Bir er adam jansaqtaý bóliminde jatyr. Onyń denesiniń 20% deıin kúıgen. Al qalǵan tórteýi travmatologııa bóliminde.
— Naýqastardyń jaǵdaıy dárigerler baqylaýynda. Arnaıy mamandar em-dom jasap jatyr, — dep habarlady Aqtóbe oblystyq densaýlyq saqtaý basqarmasynyń baspasóz qyzmeti.
Quzyrly organdar ázirge zardap shekkenderdiń kim ekenin, olardyń jasy týraly aqparat bermedi.
Buǵan deıin habarlaǵanymyzdaı, Oralda kópqabatty úıden órt shyǵyp, 14 adam evakýatsııalandy.