Aqtóbede qoǵamdyq shtab ókilderi sý kirgen úılerge baryp, turǵyndarmen kezdesip júr
AQTÓBE. KAZINFORM – Aqtóbede qoǵam belsendileri, depýtattardan quralǵan qoǵamdyq shtab ókilderi sý tasqyny kezinde zardap shekken otbasylarmen kezdesip, olardyń úılerin aralap júr. Búginge deıin 230-dan astam kezdesý ótkizdi.
Aqtóbede oblystyq, qalalyq jáne aýdandyq qoǵamdyq shtabtar jumys istep tur. Olardyń quramynda máslıhat depýtattary, «Amanat» partııasynyń, qoǵamdyq keńestiń músheleri, bıznes qurylymdardyń, bilim berý, densaýlyq saqtaý, jastar birlestikteriniń ókilderi, din qaıratkerleri bar.
- Basty maqsat – sý tasqynynan zardap shekken azamattarǵa jan-jaqty qoldaý kórsetý. Qajet bolǵan jaǵdaıda shtab músheleri problemalardy sheshýge tıisti memlekettik organdar men qarjy mekemeleriniń ókilderin tartyp, kezdesý ótkizedi. Ýaqytsha ornalastyrý pýnktterine baryp, aqtóbelikterge túrli baǵyttarda kómek beredi. Osy ýaqyt aralyǵynda 230-dan astam kezdesý ótkizildi,- dep habarlady Aqtóbe oblysy ákiminiń baspasóz qyzmeti.
Aqtóbe qalasy boıynsha evakýatsııalyq beketterde myńnan astam adam bolsa, onyń teń jartysy bala. Olardyń kóbi baý-baqsha ujymdarynyń turǵyndary.
- Qarǵaly ózeniniń boıyndaǵy Qurylysshy-7 baý-baqsha ujymynda turamyz. Sol aýmaqta 18 jyldan beri turamyz. Kóktem kelse únemi úreıde otyramyz. Sondyqtan qaýipsiz jerge kóshkimiz keledi. Al evakýatsııalyq pýnkt dep bólgen jataqhanamyz jaıly. Qyzmetkerlerine rızamyz,- dedi qala turǵyny Tolǵanaı Tileýova.
Aqtóbe qalasy boıynsha saıajaı aýmaǵynda turatyn adamdardyń keıbiriniń qujaty durys emes. Qoǵamdyq shtab osy tusta arnaıy mamandardy shaqyryp, keńes berýge kóshken.
- Keıbiri qosymsha qurylys salyp, qujatty jańartpaǵan. Sonymen birge arasynda qujatyn joǵaltyp alǵan adamdar da bar. Ár adamǵa jeke-jeke kómek berilip jatyr,- dedi Aqtóbe oblystyq máslıhatynyń depýtaty, qoǵamdyq shtab múshesi Estaı Seısenbaev.
Aıta keteıik, Aqtóbe qalasynyń Almaty jáne Astana aýdandary boıynsha barlyǵy 3 myńnan astam otbasynan ótinish tústi. Qalada barlyǵy 35 úı qulaǵan.
