Aqtóbede qyzylsha juqtyrǵan 100-den astam adam aýrýhanada em alyp jatyr

AQTÓBE. KAZINFORM — Aqtóbe oblysy boıynsha qazirgi kezde 101 adam aýrýhanada em alyp jatyr. Onyń 83-i — bala.

Aqtóbe oblystyq densaýlyq saqtaý basqarmasynyń habarlaýynsha, bıyl oblys boıynsha qyzylsha juqtyrǵandardy emdeý úshin 327 kereýet daıyndaǵan.

Onyń 80 paıyzǵa jýyǵy balalarǵa arnalǵan. 

— Aqtóbe ftızıopýlmonologııalyq ortalyǵynyń ońaltý bóliminde 215 kerýet bar. Onyń 25-i eresekter, 190-y balalar úshin. Sonymen qatar aýdandar boıynsha barlyǵy 101 kerýet bólinip otyr. Qazirgi tańda oblysta qyzylsha juqtyrǵan 101 adam statsıonarda em alýda. QR Bas memlekettik sanıtarııalyq dárigeriniń qaýlysyna sáıkes byltyr qarasha aıynan bastap 46 171 adam qyzylshaǵa qarsy ekpe aldy. 6 aı-10 aı 29 kúnge tolǵan balalar sany 6 myńnan assa, 2-4 jas aralyǵyndaǵy balalar sany 35,2 myńdy qurady. Sonymen birge 2 myńnan astam medıtsına qyzmetkeri qaıta ekpe saldyrdy, — dep habarlady Aqtóbe oblystyq densaýlyq saqtaý basqarmasynyń baspasóz qyzmeti.

Aqtóbe oblysyndaǵy emhanalardyń ýchaskelik dárigerleri jaǵdaı birqalypqa túse bastaǵanyn aıtyp otyr. Buǵan deıin kúnine 5-10 adam kómek surasa, qazir 10 kúnde bir baladan qyzylsha anyqtalǵan. 

— Kóbine vaktsınadan bas tartqan adamdar qyzylsha juqtyrdy. Bizdiń aýmaqta 80-nan astam bala bolsa, sonyń teń jartysyna jýyǵy aýyrdy. Sonymen birge 6 aıǵa tolmaǵan balalar juqtyrdy. Sebebi alǵashqy vaktsına olarǵa 6 aıynda salynýy tıis. Al balalar 4-5 aılyǵynda aýyryp qalyp jatty. Ekpeden bas tartqan bala juqtyrsa, 1-2 aı boıy emdelip jatyr. Sebebi asqynyp, kóbi bronhıt boldy. Qyzylshamen aýyrǵan kezde ókpeniń shyryshty qabaty qabynyp, jótel ketpeı jatyr. Mundaıda dárýmen berip, ımmýnıtetti kóteremiz. Buryn kúnine 5-10 adamnan anyqtalsa, qazir on kúnde bir baladan tirkelip tur, — dedi Aqtóbe qalasy ıAsnyı turǵyn alabyndaǵy emhananyń joǵary dárejeli pedıatri, nevropatolog Móldir Aryqbaeva.