Aqtóbede qyzylsha vırýsyn juqtyrǵandarǵa taǵy bir emdeý orny berildi
Aqtóbe qalasynda qyzylsha derti órship tur. Oblystyq ınfektsııalyq aýrýhanadaǵy kereýet tolyp, «Shaǵala» saýyqtyrý ornynan 80 kereýettik oryn jasaqtaldy, dep habarlaıdy Kazinform.
Aqtóbe oblysy boıynsha bıyl 800-den astam adamnan qyzylsha anyqtalyp, túrli em qabyldady. Qazirgi kezde oblystyq ınfektsııalyq aýrýhanada 81 adam em qabyldap jatyr. Olardyń kóbi – bala.
«Búgingi kúni oblystyq ınfektsııalyq aýrýhanada 81 adam jatyr. Onyń 68-i bala, ózgesi eresek. Jalpy aqpan aıynan bastap 828 adamnan vırýs anyqtaldy. Bir adam Túrkııadan juqtyryp kelip, ári qaraı ulǵaıyp ketip otyr. Epıdjaǵdaıǵa baılanysty oblystyq ınfektsııalyq aýrýhanada 75 kereýet bar. «Shaǵala» saýyqtyrý ornynan taǵy 80 kereýet ashyldy. Balalar dertti jeńil ótkerse, úıine jiberemiz. Al larıngıt, farıngıt, bronhıolıt, pnevmonııa bolsa, balalar aýrýhanaǵa jatqyzylady. Aýdandarda jaǵdaı turaqty. 15 naýqas jatyr. Olar Baıǵanın, Yrǵyz, Muǵaljar aýdandarynda», - dedi Aqtóbe oblystyq densaýlyq saqtaý basqarmasynyń basshysy Rústem Isaev.
Qazir epıdemıologtar men dárigerler vaktsına qabyldaýǵa shaqyryp jatyr. Óńirge 30 myń doza vaktsına jetkizildi. Ol úshin respýblıkalyq bıýdjetten 90 mln teńge qarjy bólingen.
«Vaktsına qabyldamaǵan adamdarǵa ekpe salynyp jatyr. Sonymen birge jasy 55-ke tolmaǵan medıtsına qyzmetkerleri ımmýndaý sharasyna qatysady. Shamamen qarasha aıynyń ortasynda sharyqtaý shegine jetip, keıin basylady dep boljap otyrmyz. Óıtkeni vaktsına alǵan adamdardyń ımmýnıteti eki aptadan keıin ǵana vırýsqa tótep bere alady. Qazirgi kezde vaktsına almaǵan bala kóp. Kóbiniń ata-anasy dinı senimge basymdyq berip, balasyna saldyrmaıdy. Túsindirý jumystary júrip jatyr», - dedi Rústem Isaev.
