Aqtóbede qyzǵaldaq ustap fotoǵa túsken aýyl ákiminiń isin komıssııa tekserip jatyr

AQTÓBE. KAZINFORM — Muǵaljar aýdany Qudaıbergen Jubanov atyndaǵy aýyldyq okrýg ákimi Lázzat Berdibaevanyń fotosyn endi arnaıy komıssııa zerdeleıdi.

Qudaıbergen Jubanov atyndaǵy aýyldyq okrýg ákimi Lázzat Berdibaevanyń gúl ustap túsken fotosy áleýmettik jeli arqyly tarap ketti. Qazirgi kezde polıtsııa fotodaǵy gúldiń Qyzyl kitapqa engen-enbegenin tekserip jatyr. 

— Tekserip, qyzǵaldaqtyń Qyzyl kitapqa engen túri me degen suraqqa jaýap izdeımiz. Keıin quqyqtyq baǵasy beriledi, — dedi oblystyq PD baspasóz qyzmetiniń jetekshisi Erbolat Sarqulov.

Al Muǵaljar aýdanynyń ákimi Darhan Ermaǵambetov qazir arnaıy komıssııa qurylǵanyn aıtty.

— Aýdanda Memlekettik qyzmet isteri agenttigi Aqtóbe oblysy boıynsha departamentiniń ókili bar. Sol komıssııada is qaralady. Onyń quramynda aýdandyq polıtsııa bóliminiń ókili de bar. Keıin ǵana sheshimin aıtyp, jaýapqa tarta alamyz. Ol gúldi qyzdary julyp ákelgenin, fotoǵa túsip, WhatsApp messendjerindegi statýsyna qoıǵanyn aıtyp otyr, — dedi Darhan Ermaǵambetov.

Eske salsaq, Túrkistan oblysynda qyzǵaldaq julǵan turǵynǵa qatysty qylmystyq is qozǵaldy.