Aqtóbede qyzǵaldaq ustap fotoǵa túsken aýyl ákimi sotta ózine taǵylǵan aıypqa kelispedi
AQTÓBE. KAZINFORM – Q.Jubanov atyndaǵy aýyldyq okrýg ákimi Lázzat Berdibaeva sotta hattamaǵa kelispeıtinin aıtyp, ákimshilik jaýapqa tartpaýdy surady.
Q.Jubanov atyndaǵy aýyldyq okrýg ákimi Lázzat Berdibaevaǵa qatysty is Aqtóbe oblystyq kámeletke tolmaǵandar isteri jónindegi mamandandyrylǵan aýdararalyq sotynda qaralyp jatyr.
Búgin sotta ýchaskelik ınspektor, orman sharýashylyǵynyń mamany jáne aýyl ákiminiń ózi sóıledi.
Quqyq buzýshy Lázzat Berdibaeva aýyldaǵy aqsaqaldar keńesi, jergilikti qoǵamdyq keńes, mektep dırektory men oqýshy qyzdarynyń synyp jetekshilerinen qoldaý hat ákeldi. Muǵaljar aýdandyq polıtsııa bólimi ıývenaldy polıtsııa tobynyń aǵa ýchaskelik polıtsııa ınspektory Dúısenbaevtiń sózinshe, 21 sáýir kúni saǵat 15:30 shamasynda Qandyaǵash-Juryn tasjolynyń jıeginde L.Berdibaeva óz otbasymen birge tabıǵat aıasynda demalysyn ótkizgen. Sol kezde kámelet jasqa tolmaǵan qyzdary 10-15 tal qyzǵaldaq julyp, anasyna syılaǵan. Al quqyq buzýshy L.Berdibaeva kámelet jasqa tolmaǵan qyzdaryna gúldi julýǵa bolmaıtynyn eskertip aıtpaǵan, balalaryn qadaǵalamaǵan. Sol úshin de hattama toltyryp, is sotqa túsip tur. Inspektor aıǵaq zattardyń bolmaýyna baılanysty qylmystyq is qozǵalmaǵanyn aıtty. Alaıda Lázzat Berdibaeva hattamamen kelispedi.
- Ákimshilik quqyqbuzýshylyq týraly kodekstiń 127 baby 1 bólimi týraly hattamamen kelispeımin. Sebebi polıtsııa qyzmetkeri 21 sáýir dep aıtty. Bul 19 sáýir kúni bolǵan edi. 19 sáýir – senbi. Demalys ýaqytyn otbasymmen ótkizý maqsatynda saǵat shamamen 15:30-da tabıǵat aıasyna shyqtym. Qandyaǵash-Juryn tasjol baǵytynan alystamaı jol jıegine toqtap, otyrmaqshy boldyq. Jol boıynda eshqandaı eskertý, aqparattyq taqta nemese qorǵaý belgisi ornatylmaǵan. Aınalamyzda sıyr, jylqy jaıylyp júrdi.
Jaıylym jerge toqtap, bárimiz kólikten tústik. Men alyp kelgen taǵamdarymdy shyǵaryp, dastarhan jaıamyn degenshe 5-4 mınýt ýaqyt ótti. 8 jáne 6 jastaǵy qyzdarym «mamataı, mynaý sizge» dep shamamen 10-15 tal gúl julyp syılady. Oıymda artyq eshteńe joq. Analyq ınstınktpen «balalarymnyń bergen gúli ǵoı» dep fotoǵa tústim jáne ózimniń WhatsApp statýsyma saldym. Qyzdarymnyń áreketi tabıǵatqa zııan keltirý emes, anasyna qýanysh syılaý maqsatynda edi,- dedi ol sot otyrysynda.
Sonymen birge gúl julýǵa bolmaıtynyn eskertken, al hattama toltyrǵan polıtsııa ınspektory janynda bolmaǵan soń ol týraly bilmeıdi dedi.
– Balalardyń áreketteri tabıǵatty qasaqana búldirýge baǵyttalmady. Olar mektepke baryp júrgen tártipti, jaýapty balalar. Bala tárıbesimen ózim de, joldasym da aınalysady. Zań men tártipti saqtaý meniń azamattyq jáne qyzmettik mindetim. 18 jyl memlekettik qyzmette qyzmet etip kele jatyrmyn. Eshqashan teris qylyǵym úshin jaýapty bolmadym. Bul qyzmetke 2024 jyldyń aqpan aıynda keldim. Zatym áıel bolsa da er azamattarmen qatar óz mindetimdi adal atqaryp júrmin. Ákimdigimnen buryn áıelmin, anamyn. Áleýmettik jelide jazylǵan pikirler edáýir qysym boldy. Depressııaǵa túsip, aıtarlyqtaı zııan keldi,- dedi ol sotta.
Lázzat Berdibaeva is materıaldarynda eshqandaı saraptama qorytyndysy joq ekenin, fotodaǵy gúldiń erekshe qorǵalatyny nemese Qyzyl kitapqa engizilgeni týraly dálel bolmaǵanyn alǵa tartty. Oqıǵa bolǵan jer de erekshe qorǵalatyn aımaqqa kirmeıdi.
- Іs materıaldarynda ákimshilik quqyqbuzýshylyq quramy bar ekenine dálel bolatyn jetkilikti, obektıvti fakti kórsetilmegen. Meniń áreketimde ákimshilik zańbuzýshylyq bolmaǵanyn, kinámniń dáleldenbegenin nazarǵa alyp, ákimshilik quqyqbuzýshylyq boıynsha isti toqtatýyńyzdy suraımyn,- dedi L.Berdibaeva.
Sotqa shaqyrylǵan Aqtóbe oblystyq orman sharýashylyǵy jáne janýarlar dúnıesi aýmaqtyq ınspektsııasynyń bas mamany Artýr Qańtarbaev gúldiń qyzǵaldaq ekenin aıtqanymen, qaı túrine jatatynyn tek ǵylymı zertteý ınstıtýttary anyqtaıtynyn túsindirdi.
Onyń aıtýynsha, Aqtóbede úsh túrli qyzǵaldaq kezdesedi. Ásirese Shrenka qyzǵaldaǵy bar. Dál oqıǵa bolǵan Muǵaljar aýdanynda qaı túri bar ekenin de sotta aıta almady. Sot otyrysy 15 maýsym kúni jalǵasady.
Eske salsaq, Muǵaljar aýdany Qudaıbergen Jubanov atyndaǵy aýyldyq okrýg ákimi Lázzat Berdibaevanyń fotosyn áleýmettik jelige tarap, tekserý úshin arnaıy komıssııa quryldy.
Keıin onyń qylmystyq emes, ákimshilik jaýapqa tartylatyny belgili boldy.