Aqtóbede qyzǵaldaq ustap fotoǵa túsken ákimniń isi kópsheli sot otyrysynda qaralady

AQTÓBE. KAZINFORM – Botanıkalyq saraptama kezinde qyzǵaldaqtyń sırek kezdesetin nemese quryp ketý qaýpi bar tizimge jatatyny anyqtalmady. 

Aqtóbe oblystyq kámeletke tolmaǵandar isteri jónindegi mamandandyrylǵan aýdanaralyq sotynda Q.Jubanov atyndaǵy aýyldyq okrýg ákimi Lázzat Berdibaevaǵa qatysty is jalǵasty. Sýdıa búgin saraptama qorytyndysyn oqydy.

– Ákimshilik is boıynsha botanıkalyq saraptama taǵaıyndalǵan bolatyn. Fotosýretten qyzǵaldaqtyń sırek kezdesetin nemese quryp ketý qaýpi tóngen ósimdikterdiń túrine qatystylyǵy bary anyqtalmaǵan. Hattama toltyrǵan laýazymdy tulǵa naqty oqıǵa bolǵan jerdi anyqtamaǵandyqtan kóshpeli sot otyrysy keıinge qaldyrylady, - dedi sýdıa. 

Sot sheshim shyǵarý úshin Muǵaljar aýdanyna barady. Naqty ýaqyty sot otyrysy kezinde aıtalmady. 

Aıta keteıik, sáýir aıynyń sońynda Muǵaljar aýdany Qudaıbergen Jubanov atyndaǵy aýyldyq okrýg ákimi Lázzat Berdibaevanyń qyzǵaldaq ustap otyrǵan fotosy áleýmettik jelige jarııalandy. 

Keıin ákimniń qylmystyq emes, ákimshilik jaýapqa tartylatyny belgili boldy. Aqtóbe oblystyq kámeletke tolmaǵandar isteri jónindegi mamandandyrylǵan aýdararalyq sotynda qaralyp, Lázzat Berdibaevaǵa Ákimshilik quqyqbuzýshylyq týraly kodekstiń 127 baby 1 bólimi boıynsha hattama toltyrylǵany aıtyldy. Alaıda aýyl ákimi kinásin moıyndamady.

Keıin aýyl ákiminiń qolyndaǵy qyzǵaldaqtyń túrin anyqtaý úshin saraptama taǵaıyndaldy.