Aqtóbede qyzǵaldaq ustap fotoǵa túsken ákimge qatysty is toqtatyldy
AQTÓBE. KAZINFORM - Q.Jubanov atyndaǵy aýyldyq okrýg ákimi Lázzat Berdibaevaǵa qatysty ákimshilik is toqtatyldy. Ol qaýlydan keıin shaǵym túsirmeıtinin aıtty.
Aqtóbe oblystyq kámeletke tolmaǵandar isteri jónindegi mamandandyrylǵan aýdanaralyq sotynda Q.Jubanov atyndaǵy aýyldyq okrýg ákimi Lázzat Berdibaevaǵa qatysty is jalǵasty. Sýdıa Aıpatsha Mýsına hattama toltyrǵan laýazymdy tulǵa naqty oqıǵa bolǵan jerdi anyqtamaǵandyqtan kóshpeli sot otyrysy ótkenin, alaıda ákimshilik quqyqbuzýshylyqty jasaǵan orny anyqtalmaǵanyn aıtty. Keıin Lázzat Berdibaeva isti toqtatýdy surady.
- Oqıǵa bolǵan jer Aqtóbe oblysy Muǵaljar aýdany Qandyaǵash-Juryn tasjolynyń boıy. Ózińiz bardyńyz, eshqandaı qorǵalǵan aımaq emes, eshqandaı aqparattyq taqta joq. Balalarym 6 jáne 8 jasta. Olardyń áreketi jas erekshelikterine sáıkes balalyq qyzyǵýshylyq. Quqyqbuzýshylyq jasaý nıeti de bolǵan joq. Men balalarymmen birge tabıǵat aıasynda boldym. Olardy qaraýsyz qaldyrǵan joqpyn. Іs materıaldarynda ákimshilik quqyqbuzýshylyq quramnyń bar ekenine dálel bolatyn jetkilikti obektıvti faktiler kórsetilmegen. Іstegen áreketimde quqyqbuzýshylyq quram bolmaǵan. Kinámniń dáleldenbegenin eskere otyryp, ákimshilik quqyqbuzýshylyq týraly isti toqtatýdy suraımyn, - dedi Lázzat Berdibaeva.
Sýdıa Aıpatsha Mýsına kóp uzamaı qaýly shyǵardy.
- QR Ákimshilik quqyqbuzýshylyq týraly kodeksiniń 127 baby 1 bóliginde kózdelgen ákimshilik quqyqbuzýshylyq quramynyń bolmaýyna baılanysty Lázzat Berdibaevaǵa qatysty ákimshilik is toqtatylsyn. Laýazymdy tulǵa (polıtsııa – red.) qyzǵaldaq julǵan jerin naqty anyqtamaǵan. Odan basqa ákimshilik quqyqbuzýshylyq jasaý faktisin rastaıtyn qujattar usynbaǵan. Sottyń óz bastamashylyǵymen qyzǵaldaqtyń túrin anyqtaý úshin botanıkalyq-ǵylymı saraptama taǵaıyndaldy jáne ákimshilik quqyqbuzýshylyq bolǵan jerdi qaraý úshin kóshpeli sot otyrysy uıymdastyryldy. Hattamada «Qandyaǵash-Juryn tasjolynyń jıeginde» dep aıtqan Berdibaevanyń túsiniktemesi boıynsha toltyrylǵan. Biraq laýazymdy tulǵa ornyn baryp qaramaǵan. Dálel retinde fotosýret tirkelgen. Botanıkalyq-ǵylymı saraptama qorytyndysy negizinde fotosýretten qyzǵaldaqtardyń túri anyqtalmaǵan. Aqtóbe oblystyq polıtsııa departamentiniń bastyǵy ákimshilik quqyqbuzýshylyqtardy jasaýǵa yqpal etken sebepter men jaǵdaılarǵa nazar aýdarsyn. Olardy joıý jóninde sharalar qoldaný týraly usynys engizilsin, - dedi sýdıa Aıpatsha Mýsına.
Aıta keteıik, sáýir aıynyń sońynda Muǵaljar aýdany Qudaıbergen Jubanov atyndaǵy aýyldyq okrýg ákimi Lázzat Berdibaevanyń qyzǵaldaq ustap otyrǵan fotosy áleýmettik jelige jarııalandy. Keıin ákimniń qylmystyq emes, ákimshilik jaýapqa tartylatyny belgili boldy.
Aqtóbe oblystyq kámeletke tolmaǵandar isteri jónindegi mamandandyrylǵan aýdararalyq sotynda qaralyp, Lázzat Berdibaevaǵa Ákimshilik quqyqbuzýshylyq týraly kodekstiń 127 baby 1 bólimi boıynsha hattama toltyrylǵany aıtyldy. Alaıda aýyl ákimi kinásin moıyndamady. Keıin aýyl ákiminiń qolyndaǵy qyzǵaldaqtyń túrin anyqtaý úshin saraptama taǵaıyndaldy. Botanıkalyq saraptama kezinde qyzǵaldaqtyń sırek kezdesetin nemese quryp ketý qaýpi bar tizimge jatatyny anyqtalmady.