Aqtóbede qyzdy qorqytyp, zorlaǵan er adam 20 jylǵa sottaldy
AQTÓBE. KAZINFORM - Aqtóbe oblystyq sotynyń sot alqasy apellıatsııalyq satyda úkimdi ózgerissiz qaldyrdy. Sottalýshy jazasyn qaýipsizdigi joǵary túzetý mekemesinde óteıdi.
Oqıǵa byltyr kúzde boldy. Іs materıalyna súıensek, 39 jastaǵy sottalýshy kámelet jasqa tolmaǵan qyzdy kósheden ustap alyp, pyshaq taqap qorqytady. Sol kezde seksýaldyq zorlyq kórsetip, keıin páterge aparady. Jaldamaly páterde taǵy da zorlyq kórsetip, qorqytady. Sottalýshy uıyqtap qalǵan sátti paıdalanǵan jábirlenýshi oqıǵa ornynan qashyp ketedi. Oǵan deıin fotoǵa túsirip, aıǵaq jınaǵan. Dál osy foto sot otyrysynda qylmystyq istiń dáleli boldy.
Sottalýshy buǵan deıin de isti bolǵan ári probatsııalyq baqylaýda júrgen. 17 jastaǵy qyzdy zorlaǵany úshin 20 jylǵa bas bostandyǵynan aıyryldy.
- Aqtóbe oblystyq sotynyń sot alqasy sottalýshy men qorǵaýshy túsirgen apellıatsııalyq shaǵymdy qarap, Aqtóbe oblystyq qylmystyq ister jónindegi mamandandyrylǵan aýdanaralyq sotynyń úkimin ózgerissiz qaldyrady. Taraptar Kassatsııalyq sotqa shaǵym túsire alady, - dedi Aqtóbe oblystyq sotynyń sot alqasy.
Buǵan deıin habarlaǵanymyzdaı, Aqtóbede kámeletke tolmaǵan qyzǵa seksýaldyq zorlyq kórsetken áskerı qyzmetshi sottaldy. Sot áskerı qyzmetshini aıypty dep tanyp, 15 jyl 6 aıǵa bas bostandyǵynan aıyrdy.
