Aqtóbede qystyń borandy kúnine daıyndyq júrip jatyr
AQTÓBE. KAZINFORM – Aqtóbe oblysynda barlyq baǵyttaǵy joldarǵa jaýaptylar qysqa ázirlenip jatyr. Bıyl óńirde 129 jylytý beketi jumys isteıdi.
Aqtóbede respýblıkalyq, oblystyq mańyzy bar joldardy qysqa daıyndaý jumysy júrip jatyr.
– Qazirgi kezde tótenshe jaǵdaılar qyzmeti men azamattyq qurylymnan 1 567 adam men 455 tehnıka ázir. Respýblıkalyq jáne oblystyq mańyzy bar joldarda 129 jylytý beketi bolady. Onda borandy jáne aıazdy kúni jolda qalǵandar jetkizilip, kómek kórsetiledi, - dep habarlady Aqtóbe oblystyq TJD baspasóz qyzmeti.
Al Aqtóbe qalasynda bıyl avtojoldardy kútip ustaý konkýrsyn utyp, mindetteme alǵan 17 merdiger bar. Olar 24 ýchaskede jumystaryn jalǵastyryp jatyr.
– Bul mekemeler qazir 240-tan astam arnaıy tehnıkany qysqa daıyndap jatyr. Arnaıy tehnıkalardyń júrgizýshilerinen bólek merdiger uıymdarda jol jıekterin tazalaıtyn 250 jumysshy bar. Qazir ınertti materıaldardan 1 myń tonna tuz, 2 myń tonna qum daıyn tur, - dedi Aqtóbe qalasy ákiminiń baspasóz hatshysy Aıgúl Baımenova.
Aıta keteıik, qala ishindegi jumysty júıeleý úshin byltyr «ATK qyzmet» kommýnaldyq mekemesi quryldy. Bıýdjetten qarjy bólinip, oǵan 80-nen astam tehnıka satyp aldy. Onyń 18-i tuz shashatyn, 14-i qar tasıtyn kólik jáne 8 júk tıegish, 4 jańa avtogreıder, 8 jańa traktor qysqy maýsymǵa ázir.
Eske salsaq, mundaı daıyndyq jumystary elimizdiń barlyq óńirinde júrip jatyr. Máselen «QazAvtoJol» UK» AQ-y bıyl qysqy kóktaıǵaqta sebiletin tehnıkalyq tuz, qum, hımııalyq reagent sekildi materıaldar byltyrǵydan 3 ese mol daıyndalǵan.
