Aqtóbede qysta joldardy kútip ustaýǵa 3 mlrd teńgege jýyq qarjy jumsalady

AQTÓBE. KAZINFORM — Qarjynyń 1,2 mlrd teńgesi oblystyq, 1,5 mlrd teńge aýdandyq mańyzy bar jolǵa qarastyryldy.

Aqtóbede jergilikti mańyzy bar joldardyń uzyndyǵy — 4 440 km. Joldy kútip ustaý úshin 174 ýchaskege bólingen. Oǵan 44 kásiporyn jaýapty. Jaýapty merdigerlerde 290 tehnıka bar. Jolǵa 5 myń tonna ınertti materıal, 1,8 myń tonna dızel otyny ázirlengen.

— Jalpy jergilikti joldardy kútip ustaýǵa 2,7 mlrd teńge qarastyryldy. Degenmen qarjy normatıvke sáıkes bólinbeı otyr. Kólik mınıstrligi avtomobıl joldaryn kútip ustaý úshin jańa qujat bekitti. Atalǵan qujatqa sáıkes shyǵyn burynǵyǵa qaraǵanda artqan. Osyǵan oraı aldaǵy jyldary qarjy jańa normatıv talaptaryna sáıkes qaıta qarastyrylady. Sondaı-aq Baıǵanın, Qarǵaly, Shalqar jáne Oıyl aýdandary boıynsha kelisimshart merzimderi aıaqtaldy. Bul aýdandarda qańtar-aqpan aılarynda merdigerlermen aradaǵy kelisimshart uzartyldy, — dedi oblystyq jolaýshylar kóligi jáne avtomobıl joldary basqarmasynyń basshysy Aıbek Qaıyr.

Aqtóbede oblystyq mańyzy bar joldardyń 98 shaqyrymyna qar kóp jınalady. Bul Dóń-Badamsha–Aqtóbe–Orsk, Qobda — Mártók, Aqtóbe–Rodnıkovka–Mártók, Aqtóbe–Bolgarka–Shubarqudyq baǵytyndaǵy jolda. Munda uzyndyǵy 5 myń metr bolatyn qar toqtatý qurylǵysy ornatylyp jatyr.

— Oblystyq mańyzy bar jáne Alǵa, Qarǵaly, Mártók, Temir aýdandarynyń jergilikti mańyzy bar joldaryndaǵy arnaıy tehnıkalarda GPS navıgatorlar ornatyldy. Bul arnaıy tehnıkanyń naqty ornalasqan jerin jáne qozǵalys baǵytyn baqylaýǵa múmkindik beredi. Ózge aýdandardaǵy arnaıy kólikterge de ornatylady, — dedi Aıbek Qaıyr.

Aıta keteıik, jyl basynan beri Aqtóbede birneshe ret joldar jabyldy. Polıtsııa men tótenshe jaǵdaılar qyzmeti sheteldikter mingen avtobýs jolaýshylaryna kómek kórsetti.