Aqtóbede qys saıyn keptelis bolatyn joldyń bir bóligi jańadan salyndy

AQTÓBE. KAZINFORM – Samara-Shymkent respýblıkalyq mańyzy bar jolynyń 28 shaqyrymy qoldanysqa berildi. Aqtóbe-Qarabutaq-Ulǵaısyn jobasynyń qurylys jumystary áli birneshe jylǵa sozylady.

Samara-Shymkent tasjolynyń jıi jol apaty bolatyn, qys mezgilinde júk kólikteri turyp qalatyn aýmaǵynda qurylys jumystary byltyr bastaldy. Bıyl Tassaı jáne Jazyq aýyldarynda ótkelder salynyp, qoldanysqa berildi.

- Kópir salý jumysynyń 95 paıyzy aıaqtaldy. Quny – 3 mlrd teńge. Munda asfalt jabyndysy tóseldi. Kópirde abattandyrý jumystary qaldy. Bul eki jolaqty jol. Janynda taǵy eki jolaqty eski jol bar. Qysta, borandy kúni sol eski joldy da paıdalanýymyz múmkin,- dedi «QazAvtoJol» AQ AOF dırektory Aıbol Danaǵulov.

Joldyń uzyndyǵy - 262 shaqyrym. Qurylys júrgizý jobasy kezinde jol 7 ýchaskege bólindi. Qarjy ınstıtýttary anyqtalyp, keler jyly jumysyn bastaıtyn merdigerlerdi bekitý úshin konkýrs ótkizilip jatyr. Qurylys jumystary 2024–2028 jyldarǵa josparlanǵan.

- Byltyr Aqtóbe – Qandyaǵash tasjoly tapsyryldy. Bıyl 230 shaqyrymǵa ortasha jóndeý jumystary júrgizildi. Ol jumystarǵa Aqtóbe oblysyna 50 mlrd teńgeden astam aqsha bólindi,- «Qazavtojol» UQ» AQ basqarma tóraǵasy Darhan Imanashev.

Byltyr dál osy baǵytta birneshe shaqyrymdyq kólik keptelisi boldy. Joldar men kempıngterde 2 myńnan astam kólik turyp qaldy.