Aqtóbede kirpish saýdasy qyzyp tur
AQTÓBE. QazAqparat - Aqtóbede kirpish shyǵaratyn zaýyttardyń saýdasy qyzyp tur. Óńirde shyǵarylyp jatqan kirpishtiń teń jartysy «Nurly jer» baǵdarlamasynyń qurylys jumystaryna jumsalyp jatyr, dep habarlaıdy QazAqparat tilshisi.
Aqtóbedegi kirpish zaýyttary memlekettik baǵdarlamalardyń ýaqtyly iske asyrylýyna septigin tıgizip keledi. Sonymen qatar, qurylys materıaly kórshiles oblystarǵa jetkizilip jatyr.
«Jeke turǵyn úı qurylysy, túrli qajettilikterge kirpish qajet. Memlekettik baǵdarlamamen salynyp jatqan qurylys aýqymy keń. Sondyqtan óńirdegi kirpish zaýyttary tapsyrysty qabyldaıdy, biraq áreń úlgerip jatyr. Máselen, «Kóktas Aqtóbe» JShS-i kirpish zaýytynyń aýqymyn keńeıtýdi josparlap jatyr. Qazir óńirde kirpishten bir jarym ese úlken sılıkatty tasqa aýysyp jatyrmyz»,- dedi oblystyq qurylys, sáýlet jáne qala qurylysy basqarmasynyń basshysy Serik Tólegenov.
Aıta keteıik, Aqtóbede Úı qurylys kombınaty jumys istep tur. Munda kúnine 24 panel shyǵarylady. Eki aýysymdyq jumysqa kirisken kombınat «Nurly jer» baǵdarlamasy boıynsha tran haýs, kottedj qurylysyn bastady. Esep boıynsha kombınattan bir kúnde bir kottedjge qajetti panel shyǵarylyp jatyr. Ony qurastyrý jumystaryna 10 kún qajet bolady.
«Nurly jer» baǵdarlamasy boıynsha 194 kottedj salynyp jatyr. Onyń 52-si panelden, 72-si gazdybetonnan, ózgesi gazbloktan salynady. Barlyq qurylys kompanııasyna múmkindik berip, baǵdarlamany iske asyrýǵa úles qosýǵa jol ashyldy. Sóıtip, turǵyn úı salý kezinde paıdalanylǵan qurylys materıalynyń 80 paıyzy jergilikti jerden shyǵarylyp jatyr. Ózgesin basqa oblystardan alamyz»,- dedi Serik Tólegenov.
Aqtóbede «Nurly jer» baǵdarlamasy boıynsha salynyp jatqan turǵan úılerge suranys joǵary. 194 kottedjdi satyp alýǵa 500 adam ótinish túsken. Úılerdiń bári Turǵyn úı qurylys jınaq banki arqyly jer kezeginde turǵandarǵa beriledi.
