Aqtóbede qyrylǵan iri qara sany 50-den asyp ketti
AQTÓBE. KAZINFORM – Óńirge QR Aýyl sharýashylyǵy mınıstrligi veterınarııalyq baqylaý jáne qadaǵalaý komıtetiniń mamandary keldi. Saýyqtyrý sharalaryn respýblıkalyq epızootııaǵa qarsy jasaq júrgizedi.
Yrǵyz aýdanynyń Qyzyljar aýyldyq okrýginde áli de iri qara mal ólimi tirkelip jatyr. Resmı derek boıynsha 51 basqa jetti. Maldan teılerıoz, pıroplazmoz jáne keıbirinen leptospıroz anyqtaldy.
- Teılerıoz ben pıroplazmoz – qansorǵysh keneler arqyly taralatyn parazıttik aýrýlar. Al leptospıroz janýarlardyń asa qaýipti aýrýlarynyń biri, onyń negizgi tabıǵı tasymaldaýshylary kemirgishter. Búginde mamandar kún saıyn eldimekenderdegi úı-úıdi aralap, aýrý belgileri bar maldy oqshaýlaý, emdeý jáne ıelerine túsindirý jumystaryn júrgizip jatyr. Sonymen qatar epızootııalyq ahýaldy turaqtandyrý maqsatynda shekteý is-sharalaryn engizý boıynsha tıisti jumystar qolǵa alyndy. Saýyqtyrý sharalaryn respýblıkalyq epızootııaǵa qarsy jasaq júzege asyrady,- dep habarlady Aqtóbe oblystyq veterınarııa basqarmasy.
Keshe Yrǵyz aýdanyna QR Aýyl sharýashylyǵy mınıstrligi veterınarııalyq baqylaý jáne qadaǵalaý komıtetiniń, Aqtóbe oblystyq aýmaqtyq ınspektsııasynyń jáne oblystyq veterınarııa basqarmasynyń mamandary baryp, jergilikti turǵyndarmen kezdesý ótkizdi.
- Bul aýrýdyń kıikten juǵýy múmkin emes. Birinshiden «Ohotzooprom» ÓB RMQK Aqtóbe fılıaly qyzmetkerlerimen sóılestim. Aýrý tirkelgen Qyzyljar aýyldyq okrýgine qarasty Qurylys, Sheńbertal, Janys bı aýyldarynyń tusynda kıik jaıylmaıdy. Ekinshiden, bul aýrý malda kezdeskenimen, óńirde buryn tirkelmegen. Bıyl aýa raıy ylǵyldy bolyp, kene kóbeıýi múmkin. Bir sózben aıtqanda qazirgi kezde kıik arasynda aýrý anyqtalmady,- dedi Aqtóbe oblystyq orman sharýashylyǵy jáne janýarlar dúnıesi aýmaqtyq ınspektsııasynyń basshysy Ádilkereı Áýelbaev.
Eske salsaq 21 maýsym men 14 shilde aralyǵynda 39 iri qara óldi. Ólekse jyljymaly ınsıneratorlarda joıylady.
