Aqtóbede qyrylǵan kıik sany 108-ge jetti

AQTÓBE. KAZINFORM — Qaıraqty ózeninen 108 kıiktiń óleksesi tabyldy. Mamandar ony zalalsyzdandyryp, kómdi.

Áıteke bı aýdany aýmaǵyndaǵy Qaıraqty ózeninde 108 kıik óleksesi tabyldy. Onyń 60-y atalyq, 48-i analyq. Kıiktiń bári ózennen shyǵarylyp, kómildi.

— Sol jerden 10 myń kıik ótken. Ózende qazir sý azaıǵan, biraq tereń sý qalǵan. Kıik sý ishýge kelgen. Ekinshi jaq basy qamys, sodan óte almaı qalǵan. 10 myń kıikti elestetińiz, bir-birin taptap tastaıdy. Bizdiń boljam, tujyrym osy. Sonymen birge oblystyq ekologııa departamenti sýdan synama aldy. Veterınarııa salasynyń mamandary da synama alyp, saraptama júrgizip jatyr. Saraptama qorytyndysyn qosymsha habarlaımyz. Adam zardap shekken joq. Ol jerde 22 adam, 8 tehnıka jumys istedi, — dedi Aqtóbe oblysy boıynsha orman sharýashylyǵy jáne janýarlar dúnıesi aýmaqtyq ınspektsııasynyń basshysy Ádilkereı Áýelbaev. 

Onyń aıtýynsha, Aqtóbede kıik sany 300 myńnan asady. 

Buǵan deıin habarlaǵanymyzdaı, Aqtóbeniń Qaıraqty ózeninde kıik óleksesi tabyldy. Oqıǵa ornyna birden mamandar bardy.