Aqtóbede qylmystyq jaýapqa tartylǵan eki ákimniń ornyna jańasy saılandy
AQTÓBE. KAZINFORM – Hromtaý jáne Qandyaǵash qalalaryndaǵy saılaý qorytyndysy búgin shyqty. Eki aýdan ortalyǵy tańdaýdy keshe jasady.
Aqtóbede aýdandyq mańyzy bar qala ákimderin saılaýǵa 2 aýmaqtyq jáne 21 ýchaskelik saılaý komıssııasy jumyldyryldy. 2 saılaý okrýgi boıynsha 6 kandıdat usynyldy. Onyń bireýi «Amanat» partııasynan, qalǵany ózin-ózi usynýshy. Kandıdattardyń beseýi memlekettik qyzmetshi bolsa, bireýi – úkimettik emes uıym qyzmetkeri. Saılaý qorytyndysy boıynsha memlekettik qyzmetshi men úkimettik emes uıym qyzmetkeri eń kóp daýys jınady.
– Muǵaljar aýdany Qandyaǵash qalasy ákiminiń saılaýy ótti. Saılaý okrýgi boıynsha saılaýshylar tizimine 21 648 azamat engizildi. Olardyń ishinde 3 997 azamat daýys berdi. Jaramsyz bıýlletender sany – 239, al 44-i bárine qarsy daýys berdi. «Amanat» partııasynyń keńesshisi Danııar Shernııazov Muǵaljar aýdany Qandyaǵash qalasynyń ákimi bolyp saılandy, - dep habarlady Muǵaljar aýdandyq aýmaqtyq saılaý komıssııasy.
Al Hromtaý aýdandyq aýmaqtyq saılaý komıssııasynyń habarlaýynsha, 18 630 azamat saılaýshylar tizimine engizildi. Onyń 6 542-i daýys berdi. Jaramsyz bıýlletender sany – 34, «bárine qarsymyn» belgisin qoıylǵany – 12.
– Hromtaý qalasy ákiminiń orynbasary, «Amanat» partııasynan usynylǵan Keńshilik Bıtanov Hromtaý qalasynyń ákimi bolyp saılandy. Ol 4 561 daýys jınady. Keńshilik Bıtanov 1991 jyly dúnıege kelgen, - dep habarlady Hromtaý aýdandyq aýmaqtyq saılaý komıssııasy.
Eske salsaq, Qandyaǵash qalasynyń ákimi áıeldi uryp-soqqany úshin qylmystyq jaýapqa tartylyp, aıyppul arqalady. Apellıatsııalyq shaǵymda sot alqasynyń qaýlysymen aıyppul túrindegi jaza mólsheri 295 360 teńgege deıin tómendetildi. Al jábirlenýshi paıdasyna óndirilgen ókilge tólengen shyǵynnyń mólsheri 300 000 teńgege deıin ulǵaıtyldy.
Al Hromtaý qalasynyń ákimi ákimi Saǵyndyq Shabyqbaev Qylmystyq kodekstiń 366-baby 2-bóligimen aıypty dep tanylyp, alǵan paranyń 30 eselengen somasy, ıaǵnı, 12 mln teńge aıyppul salyndy. Túpkilikti 11 355 151 teńge aıyppul jazasy taǵaıyndaldy.
