Aqtóbede kıiktiń qyrylý sebebi naqtylandy

AQTÓBE. KAZINFORM — Ekologter sýdan synama, veterınarlar patologııalyq materıal alyp, qorytyndysy shyqty. Juqpaly aýrý anyqtalmady.

Aqtóbe oblysy Áıteke bı aýdany aýmaǵynda kıik birin-biri taptap ketip, ólgen. Aldyn ala aıtylǵan boljamdy búgin oblystyq veterınarııa basqarmasy rastady.

— Kıikter bastyrylyp ólgen, ınfektsııalyq aýrý joq. Kıikti soıyp, patologııalyq materıal aldy. Qorytyndysy osy, — dedi Aqtóbe oblystyq veterınarııa basqarmasynyń basshysy Aıbek Sembaı.

Aqtóbe oblystyq ekologııa departamenti sýdan synama aldy. Tekserý kezinde normatıvten tys artý derekteri tirkelmedi. 

Eske salsaq, Áıteke bı aýdany aýmaǵyndaǵy Qaıraqty ózeninde 108 kıik óleksesi tabyldy. Onyń 60-y atalyq, 48-i analyq. Kıiktiń bári ózennen shyǵarylyp, kómildi.