Aqtóbede kıik etine suranys joǵary
AQTÓBE. KAZINFORM — Oraldan Aqtóbege kıik ushasy jetkizilip jatyr. Qazirgi kezde et úsh bazarda satylymǵa shyqty.
Aqtóbe qalasynyń kommýnaldyq bazarymen qatar eki saýda ornynda kıik eti satýǵa shyǵarylǵan. Kóbine áleýmettik jeli arqyly habarlandyrý beriledi.
Sol kezde kórgen-bilgen adamdar lezde baryp, ózine unaǵan ushany tańdap, bólshektep alady. Kelýshiler bala kezde kıik etinen dám tatqanyn, qazir de balalarynyń suranysymen kelip, tańdaǵanyn jasyrmady.
— Áıteke bı aýdanynda turǵanmyn. Bala kezimizde kıik kóp boldy. Ol kezde kıikti qorǵaý týraly zań bolmady, múıiziniń baǵaly, qymbat ekenin de eshkim bilmedi. Sol kezde kıik etin jegen edik. Biraq birazdan beri dámin tatpaǵan soń satyp alýdy jón kórdik. Qýyryp, qaıta jep kórgim keldi. Nemerem qarap, tańdap bershi degen usynysyn jerde qaldyrmadym. Kıik etiniń paıdasy týraly kóp bile qoımaımyn, — dedi qala turǵyny Kenjeǵalı Qoshanov.
Aqtóbe qalasyndaǵy bazarlardyń birine kıik etin tasymaldap jatqan satýshylar búgin de bir júk kóligin túsirip aldy. Kıik Oral qalasynda soıylyp, tazartylady.
Ony bir rettik paketke orap, qatyrady. Muzdatqyshta ádben qatqan soń ushasyn júk kóligimen tasymaldaıdy. Eki qala arasyna bir kún ýaqyt jetkilikti.
— Aqtóbe turǵyndary men qonaqtary tamyz aıynyń sońy, qyrkúıek aıynyń basynan bastap kıik etin satyp alyp jatyr. Ótimi jaqsy. Úlken kisiler bala kúngi dámdi aıtyp keledi. Eti óte paıdaly. Aqýyzǵa baı, dıetalyq et. Júkti kelinshekterge de paıdaly. Sebebi kıik dalalyqta túrli shóppen qorektenedi. Eti de dárýmenge toly. Qazir kıik eti bar. Araǵa 10-15 kún salyp, ákelip jatyrmyz. Bir ákelgende 3-10 tonnasyn tasymaldap, muzdatqyshta saqtap, sata beremiz, — dedi satýshy Artýr Saǵyntaev.
Áleýmettik jeli arqyly ǵana emes, adamdar bir-birinen estip kelip jatyr.
— Bir aqtóbelik kıik etin satyp aldy, keıin onyń artynan 10-15 adam estip keldi. Kóbine úlken kisiler keledi munda. Sondyqtan bolar, bir júk kóligine tıilgen kıik eti keıde 2-3 kúnde ótip ketedi. Qazir biz káýapqa daıyn etip tuzdap berýdi de jarnamalap jatyrmyz. Keıbir satyp alýshylar aldymen sol ádispen dámin tatyp, keıin ǵana ushasyn satyp aldy. Sonymen birge kıik etinen kotlet te jasaýǵa bolady. Tapsyrys berse, ony da jasap berýge ázirmiz. Negizi kórip, tańdap alǵan durys. Bir adam tańerteń alyp, keshke qaıta ákeletin kezder bolady, — dedi satýshy Artýr Saǵyntaev.
Onyń aıtýynsha, kıik eti qazan aıynyń sońyna deıin satylýy múmkin.
— Kóbi kıik atý, ony soıý jaıyn suraıdy. Bul jumystyń bári Oral qalasynda atqarylady. Soıǵan soń qatyryp, orap beredi. Bir kúnde Aqtóbege jetkizemiz, — dedi Artýr Saǵyntaev.
Aıta keteıik BQO aýyl sharýashylyǵy basqarmasynyń basshysy Jasulan Halıýllınniń aıtýynsha, Oralda «Kaırov» JK, «Amangeldi» JK, «Jalpaqtal» aýyl sharýashylyǵy óndiristik kooperatıvi jáne «Jeńis» JK kıik etin ushalaı satyp jatyr.
Ekologııa mınıstri kıik etiniń sapasyna eshqandaı kúmán bolmaýy kerek ekenin aıtty. Sebebi sanıtarııalyq-epıdemıologııalyq baqylaý organdarynyń mamandary búkil protsedýrany qadaǵalaıdy.
