Aqtóbede qıyrshyq tas óndiretin kompanııaǵa 10 mlrd teńge aıyppul salyndy
AQTÓBE. KAZINFORM – Jyl basynan beri ekologtar 200-den astam ákimshilik aıyppul saldy. Eń úlken soma – 10 mlrd teńge.
Bıyl birinshi jartyjyldyqta ekologtar óńirdegi 70 kásipkerlik sýbektisine baqylaý júrgizdi. Baqylaý kezinde 400-den astam buzýshylyq anyqtalǵan.
- 6 aıynda jalpy somasy 10 mlrd teńgeden asatyn 228 ákimshilik aıyppul salyndy. Onyń tek 400 mln teńgege jýyǵy óndirildi. Máselen «Qazaqtúrikmunaı» JShS-ne 252 mln teńgege eki ákimshilik aıyppul salynyp, óndirildi. Sonymen birge «Qazaqstandyq munaı jabdyqtary zaýyty» JShS-ne 11 ákimshilik aıyppul salynyp, tólendi. Ol 20 mln teńgege jýyq qarjy. «Taý-Ken» JShS-nen 17 mln teńge, «Gas Processing Company» JShS-nen 45 mln teńge óndirildi. Tek «Muǵaljar ınertti materıaldar zaýyty» JShS áli aıyppuldy ótemedi. Somasy – 10 mlrd teńge. Bul kompanııaǵa sáýir aıynda tekserý júrgizildi. Qıyrshyq tas óndirý kezinde shańdy basyp, sý sebýi tıis edi. Biraq bul talap oryndalmaǵan. Eger aıyppuldy tólemese sotqa júginip, isti sot oryndaýshylarǵa jiberemiz. Kompanııa únsiz otyr, departamentke de, mınıstrlikke de qarsy shaǵym bermedi,- dedi Aqtóbe oblystyq Ekologııa departamenti basshysynyń orynbasary Talap Usnadın.
Aıta keteıik, óndiristi óńirdegi munaı-gaz jáne taý-ken salasynda ónerkásiptik shyǵaryndylardyń úlesi áli de basym. Byltyr jalpy kólemi 44,6 myń tonna boldy. Bıyl kólemi 5% tómendedi.
Eske salsaq, Qyzylordada ekologııa talabyn buzǵan kásiporyndarǵa 3,5 mln teńgeden asa aıyppul salyndy.
