Aqtóbede kıik múıizin tasymaldaǵan Ózbekstan azamaty ustaldy
AQTÓBE. QazAqparat - Aqtóbede kıik múıizin tasymaldaǵan Ózbekstan azamaty ustaldy. «Brakoner» aldyn alý sharasy kezinde zańsyz shaıan tasymaldaýshylarǵa aıyppul salyndy, dep habarlaıdy QazAqparat tilshisi.
Aqtóbede «Brakoner» aldyn alý sharasy ótip jatyr. Bir kún ishinde zańsyz balyq aýlap, ań atqandar ustaldy. Aqtóbe oblystyq Jergilikti polıtsııa qyzmeti, tabıǵatty qorǵaý polıtsııasy «Gaz» avtokóligin toqtatyp, Ózbekstan azamatyna tıesili sómkeden 4 dana kıik múıizin tárkiledi.
«Kıik múıizin zańsyz tasymaldaý deregine qatysty Qylmystyq kodekstiń «Ósimdikterdiń nemese janýarlardyń sırek kezdesetin jáne quryp ketý qaýpi tóngen, sondaı-aq paıdalanýǵa tyıym salynǵan túrlerimen, olardyń bólikterimen nemese derıvattarymen zańsyz aınalysý» baby boıynsha is qozǵaldy. Eger kúdiktiniń kinási dáleldense, ol aıyppul tóleıdi nemese úsh jylǵa deıingi merzimde bas bostandyǵynan aıyrylady»,- dedi Aqtóbe oblystyq ІІD baspasóz jetekshisi Nurgúl Qonaqbaeva.
Sonymen qatar, Aqtóbedegi jol-patrýldik polıtsııasy rotasynyń qyzmetkerleri jol qozǵalysy erejesin buzǵan «VAZ - 21140» avtokóligin toqtatyp, 100 keli shaıan tárkiledi. Shaıan tasymaldaýshy aıyppul tóleıdi.
