Aqtóbede kıik atqan qoryqshylar ustaldy
AQTÓBE. QazAqparat - Aqtóbe oblysy, Yrǵyz-Torǵaı rezervatynyń 7 ınspektory ustaldy. Olar kıik atyp, múıizin kesip alǵan, dep habarlaıdy QazAqparat tilshisi.
Aqtóbe oblysynyń polıtseıleri «Ohotzooprom» RMK qyzmetkerlerimen birge tabıǵat qorǵaýshy 7 ınspektordy qylmys ústinde ustap aldy. Yrǵyz-Torǵaı rezervaty ınspektorlarynyń izin kesý úshin eki kún ýaqyt jetkilikti bolǵan. Sol aralyqta olardan 11 kıik, 8 kıik múıizi jáne ańshy myltyǵy, pyshaq tabyldy.
«Yrǵyz aýdandyq ishki ister departamentine «Atambas» jerinde 5 kıiktiń óleksesi tabylǵany týraly aqparat tústi. Jaısańbaı aýylynan 120 shaqyrym qashyqtyqtaǵy jerge Astana qalasynan arnaıy jedel tergeý toby keldi. Oqıǵa ornyna jetken «Ohotzooprom» RMK qyzmetkerleri ÝAZ avtokóliginiń izin kórip, keıin 10 shaqyrym júrgen kezde daladan eki kólikti tapty. Ekeýi de Yrǵyz-Torǵaı rezervatyna tıesili. Erekshe qorǵalatyn tabıǵı qoryqtyń ınspektorlary bul joly kúdikke ilikti. Olardyń kóliginen qan izderi, balta, kıiktiń qylshyqtary tabyldy. Sonymen qatar, 800 metr qashyqtyqtan 35 oq-dári men pyshaq anyqtaldy. Tabıǵatty qorǵaýy tıis ınspektorlar brakonerlikpen aınalysqan», - dep habarlaıdy Aqtóbe oblystyq ІІD baspasóz qyzmeti.
Aıta keteıik, osy oqıǵaǵa baılanysty Qylmystyq kodekstiń «Zańsyz ańshylyq» baby boıynsha is qozǵaldy. Kúdiktilerdiń isi tolyq dáleldense, olar 5 myń aılyq eseptik kórsetkish kóleminde aıyppul tóleıdi nemese 5 jylǵa deıin bas bostandyǵynan aıyrylady.
