Aqtóbede kıberpolıtsııa alaıaqqa aldanǵan zeınetkerdiń 9 mln teńgesin qaıtardy
AQTÓBE. KAZINFORM – Zeınetker ustaz 20 jyl boıy jınaǵan qarjysyn jáne satqan páteriniń aqshasyn kýrer arqyly salyp jibergen. Kıberpolıtsııa búgin aqshanyń teń jartysyn qaıtardy.
Aqtóbe oblystyq polıtsııa departamenti Kıberqylmysqa qarsy is-qımyl basqarmasy búgin aldanǵan zeınetkerdi polıtsııa bólimine shaqyrdy. Ómir boıy mektepte muǵalim bolyp jumys istegen 70 jastaǵy aqtóbelik eki aı boıy alaıaqqa aldanyp júrgenin bilmegen. Sóıtip ol 20 jyldyq jınaǵyn, páter satyp, onyń aqshasyn alyp, kýrerge berip jiberedi.
- Zeınetker tamyz aıynyń basynda ǵana aldanyp qalǵanyn túsinip, polıtsııaǵa júgingen. Tergeý barysynda aldymen 20 jyl boıy jınaǵan jınaq aqshasyn, ıaǵnı, 9 mıllıon teńgeni, keıin páter satqannan túsken qarajatyn da alaıaqtarǵa bergeni anyqtaldy. Eki jaǵdaıda da aqsha taksı qyzmeti arqyly maýsym jáne shilde aılarynyń sońynda joldanǵan. Alaıaqtar keń taralǵan shema boıynsha áreket etken. Aldymen jábirlenýshiniń telefonyna 1414 nómirinen SMS habarlama kelgen, artynsha ózin eGov portalynyń qaýipsizdik qyzmeti men ulttyq qaýipsizdik organdarynyń qyzmetkerleri retinde tanystyrǵan adamdar qońyraý shalyp, bank shotyna shabýyl jasalyp jatqanyn aıtqan. Osy syltaýmen olar aqshasyn «qaýipsiz shotqa» salýǵa kóndirgen. Jalǵyzbasty zeınetkerden shetelde turatyn qyzyna barý úshin páterin satqaly jatqanyn estigen alaıaqtar taǵy aldady. Onyń senimine kirip, páter satýdan túsken qarajatty da ózderine jiberýge kóndirgen,- dep habarlady oblystyq PD baspasóz qyzmetiniń jetekshisi Erbolat Sarqulov.
Keıin jedel-izdestirý sharalary júredi. Kıberpolıtsııa qyzmetkerleri aqshanyń Shymkent qalasyna jiberilgenin anyqtady. Jedel top urlanǵan aqshany izdep taýyp, tárkiledi. Al búgin polıtsııa qyzmetkerleri jábirlenýshini bólimge arnaıy shaqyryp, 9 mln teńgeni tabystady.
- Ómir boıy ustaz bolyp eńbek ettim, ózimdi saýatty adam sanaımyn. Biraq alaıaqtarǵa qalaı senip qalǵanymdy túsinbeımin. Nege birden polıtsııaǵa nemese bankke júginbegenimdi de bilmeımin. Eki kúnnen keıin týǵan kúnim. Bul sizderden alǵan eń úlken syıym boldy,- dedi ol aqtóbelik zeınetker.
Buǵan deıin habarlaǵanymyzdaı, alaıaqtardan qoryqqan aqtóbelik 22 mln teńgesinen aıyryldy. Aldanǵan áıel 2 bólmeli páterin satyp, nesıe de rásimdegen. Qazir kúdiktini izdeý jumysy júrip jatyr.