Aqtóbede kezekti jylytý maýsymyna daıyndyq kórsetkishi 40% jetip tur

AQTÓBE. KAZINFORM – Aqtóbede 633 jylý qazandyǵynyń qazir 282-i daıyn. Sý-káriz jelisiniń 44% jóndeldi. 

Aqtóbede qysqy jylytý maýsymyna daıyndyq pysyqtaldy. Oblystyq energetıka jáne turǵyn úı-kommýnaldyq sharýashylyq basqarmasynyń basshysy Arysulan Aıtbaevtiń aıtýynsha, jalpy daıyndyq deńgeıi — 40%.

— 633 qazandyqtyń 282-si daıyndaldy, bul 45%-ti quraıdy. Sý-káriz jelileri 44%-ke daıyn. Josparlanǵan 32,9 shaqyrymnyń 14,4 shaqyrymy jóndeldi. Jylý jelileriniń daıyndyǵy 25% quraıdy. 7,1 shaqyrymnyń 1,8 shaqyrymynda jumys aıaqtaldy. Jalpy uzyndyǵy 830 shaqyrymnan asatyn elektr jelisiniń 20%-y jańartyldy. Sonymen qatar, áleýmettik saladaǵy 1065 nysannyń 436-sy jóndeýden ótti, — dedi Arysulan Aıtbaev.

Al Aqtóbe jylý elektr ortalyǵy bıyl 13 qazandyqty jóndeıdi. Onyń 7-inde jumys aıaqtaldy. Sonymen birge 6 týrboagregattyń 4-i jóndeldi. Jylý taratýshy «Aqtobe su-energy group» AQ-y 27 qazandyqtyń onyn retke keltirilgen. Uzyndyǵy 1,5 shaqyrym bolatyn jylý jelisine kúrdeli jóndeý júrgizdi. Bul jospardyń 36% qurap otyr. Bıyl 16 shaqyrymdyq sý-káriz jelisi de jóndeledi. Al elektr qýatyn jetkizýshi «Energosıstema» JShS-i 833 shaqyrymnan asatyn elektr jelisin qalpyna keltiredi. Onyń ishinde 255,8 shaqyrymyna kúrdeli jóndeý jasalady. Qazirgi ýaqytta jumystyń tek 20% oryndalǵan.

— Kómir men dızel otynynyń qoryn aldyn ala qamtamasyz etý kerek. Áleýmettik nysandar men áleýmettik osal toptar turatyn úılerge erekshe nazar aýdarý qajet. Jylý berý kezinde irkilisterge jol berýge bolmaıdy. Bári aldyn ala daıyn bolýy tıis, — dep tapsyrdy oblys ákimi Ashat Shaharov.

Aıta keteıik, jylytý maýsymynda bıýdjettik uıymdarǵa 21 myń tonnadan astam kómir jáne 1,2 myń tonnadan astam dızel otyny qajet. Turǵyndar úshin 19 187 tonna kómir tasymaldanady. Qatty otyndy jetkizý tamyz aıynan bastalady.

Eske salsaq, Aqtóbede bilim berý uıymdaryn jóndeýge 5,4 mlrd teńdegen astam qarjy jumsalady. Kúrdeli jóndeý 19 bilim berý uıymyna júrgiziledi.