Aqtóbede kezeksiz medıtsınalyq tekserý júıesi jolǵa qoıylady
AQTÓBE. QazAqparat – Aqtóbe oblysy ákiminiń keńesshisi Áset Qalıev aqtóbelikterge kezeksiz medıtsınalyq tekserý júıesi jolǵa qoıýǵa ýáde berdi, dep habarlaıdy QazAqparat tilshisi.
Aqtóbede pnevmonııa jaǵdaıynyń ósýine baılanysty emhanalarda josparly qabyldaý men medıtsınalyq tekserýlerdi toqtatý týraly sheshim qabyldandy. Osyǵan baılanysty abıtýrıentter medıtsınalyq tekseristen óte almaıdy. Ásirese A.Jubanov atyndaǵy ýnıversıtettiń janyndaǵy emhanada uzyn-sonar kezek paıda bolǵan.
Áset Qalıev máseleni retke keltirip, medıtsınalyq tekserister boıynsha jumysty qalpyna keltirýge ýáde berdi.
«Josparly qabyldaý sharalaryn toqtattyq. Alaıda medıtsınalyq tekserýler boıynsha problemany nazarǵa aldyq. Biz kezeksiz medıtsınalyq tekserýlerdi qalaı uıymdastyratynymyzdy sheshemiz. Medıtsınalyq tekserý oryndary týraly alda qosymsha habarlaımyz», - dedi Áset Qalıev.
