Aqtóbede kezekpen jer alyp, úı salǵan turǵyndar sý men jaryq tartyp berýdi surady

AQTÓBE. QazAqparat – Aqtóbe qalasynyń Jańaqonys-4 jáne Jańaqonys-5 eldi mekenderinde turatyn adamdar úı salyp, endi gaz ben elektr togyn tarta almaı júr, dep habarlaıdy QazAqparat tilshisi.

Aqtóbe qalasynyń irgesinde ornalasqan Jańaqonys-4 jáne Jańaqonys-5 eldimekenderdegi jer telimi kezekte turǵan adamdarǵa berilgen. Birneshe jyldan beri munda qurylys qarqyndy júrip jatyr. Alaıda ınfraqurylymy áli tartylmaǵan.

«Jańaqonys-4 eldimekeninde turamyn. Osydan 3 jyl buryn kezekpen 10 sotyq jerimizdi aldyq. Sol kezde 2 jyl ýaqyt berip, «qurylys júrmese, qaıtarym alamyz» dep eskertti. Qazir úı bar, endi gaz, svet joq. Shaǵym aıtyp, túrli kezdesý ótkizgenimizge bir jyldan asty. Úıdi biz nesıe alyp, salǵan edik. Salyp, kósheıik desek, jaǵdaı joq. Al barmasaq, bárin tonap ketedi», - dedi Jumabek Amantýrlın.

Bul másele tek aýyzsha emes, hat túrinde de jazylyp, joldandy.

«Gaz máselesin sheship berýdi surap, hat jazyp júrmiz. Hatta memlekettik baıqaý jarııalandy dep aıtty. Biraq nátıjesi joq», - deıdi qala turǵyny Baǵdat Seıilhanov.

Turǵyndar aldyna jaýaptylar shyǵyp, máseleniń mán-jaıyn túsindirdi. Bul jobany respýblıkalyq bıýdjet esebinen iske asyrmaq bolǵan jergilikti bılik suranysqa jaýap bolmaǵanyn jetkizdi.

«Biz bul máseleni bilemiz. Jańaqonys-4 aýylynyń gaz, Jańaqonys-5 aýylynyń elektr energııasy máselesi óńir basshysy men qala ákiminiń nazarynda bar. Bul nysandarǵa respýblıkalyq bıýdjetten aqsha bólinedi degen jospar bar edi. Biraq berilmedi. Endi jergilikti bıýdjetten qarastyralady. Bıyl sheshilýi tıis másele qatarynda tur. Bul jumysqa 259 mıllıon teńge qajet», - dedi Aqtóbe qalasy Astana aýdanynyń ákimi Mamyrǵalı Aqqaǵazov.

--