Aqtóbede keıingi bes jylda 346 zańdy tulǵa men jeke kásipker bankrot boldy

Aqtóbe oblysy boıynsha memlekettik kirister departamentiniń habarlaýynsha, bankrot bolǵan kompanııalardyń kóbi kóterme saýdada ótkizý qyzmetin usynǵan.

- Bankrot dep tanylǵan boryshkerlerdiń negizgi qyzmeti ártúrli. Biraq kóbi taýarlardyń keń assortımentin kóterme saýdada ótkizýmen aınalysqan. 2021 jyly 41 boryshker bankrot dep tanylǵan. Olardyń kredıtorlyq bereshegi – 48,2 mlrd teńge. 2022 jyly 85 boryshker bankrot dep tanylyp, kredıtorlyq bereshegi 31,2 mlrd teńge, 2023 jyly 53 boryshker bankrot bolyp, kredıtorlyq bereshegi 11,5 mlrd teńge, 2024 jyly 84 boryshker bankrot dep tanylǵan, bereshegi 26,5 mlrd teńge boldy. Al 2025 jyly 62 boryshker bankrot dep tanylǵan. Olar jalpy kredıtorlyq bereshegi 21 mlrd teńgeden asady. Bıyl 6 aıda 21 boryshker bankrot boldy. Jalpy kredıtorlyq bereshegi 10,5 mlrd teńge,- dep habarlady Aqtóbe oblysy boıynsha memlekettik kirister departamenti.

Bankrot bolǵan kompanııalar ishinde «Aqtóbe-Jylyjaı» JShS-i bar. 2022 jyly «QazAgroQarjy» AQ ekonomıkalyq sotqa talap aryz túsirgen. Sol kezde kompanııanyń qaryzy 2 mlrd teńgeden asyp ketti. Al 2024 jylǵy talap etý quqyǵyn basqaǵa berý sharty jasalyp, 800 mln teńgege jýyq qarjynyń kredıtory «Aktobe Greenhouse Complex» JShS-i boldy.

- 2024 jyly kepilge salynǵan múlik - jylyjaı keshenin ýaqytsha jer paıdalaný quqyǵymen birge berý týraly sheshim qabyldanǵan. 2025 jyly «Aqtóbe-Jylyjaı» JShS-i taratyldy,- dep habarlady Aqtóbe oblysy boıynsha memlekettik kirister departamenti.

Eske salsaq, Aqtóbe oblysynyń qaryzy 143 mlrd teńgege jetti. Oǵan taǵy 19,4 mlrd teńgeden oblıgatsııalyq qaryz qosyldy.