Aqtóbede keıbir oqýshylar sońǵy qońyraýdyń soǵylǵanyn «estimeı qaldy»
AQTÓBE. QazAqparat - Aqtóbe qalasyndaǵy № 55 orta mektepte ótken saltanatty sharadan soń áleýmettik jelide talas týdy, dep habarlaıdy QazAqparat.
Keshe sońǵy qońyraý soǵylyp, oqýshylar búgin demalysta júr. Degenmen Aqtóbe qalasyndaǵy № 55 orta mektepte ótken saltanatty sharadan soń áleýmettik jelide talas týdy. Jeli qoldanýshysy Elvıra Sısenova: «Sońǵy qońyraýǵa jyldyq baǵalarynda 1-2 úshtigi bar búldirshinder nege qatystyrylmady? Nege Zarechnyıdaǵy (Aqtóbe qalasy - red.) №55 orta mektepke kelýge tyıym salyndy? Əkimmen kezdesýge tek úzdik oqýshylar tartylyp, ortasha oqıtyn oqýshylar sońǵy qońyraýǵa qatystyrylmady? Nege? Muǵalimder ózi balanyń ózine degen baǵasyn tómendetip jatyr. Ákim de sol balalar sııaqty adam emes pe. Psıhologtar qaıda qarap otyr? Ata-analar mundaıǵa jol bermeýleri kerek. Ár bala mektepte ótkiziletin sharalarǵa qatysýǵa laıyqty. Balańyzdyń mektepke degen qyzyǵýshylyǵyn tómendetpeı, balany aparý kerek. Dalada bolatyn sońǵy qońyraýdy aıaǵany ma sonda? Álde taza aýa jetpeıdi dep qorqady ma?»,- dep jazdy ol.
Sodan keıin ózin №55 orta mektep dırektorynyń tárbıe isi jónindegi orynbasarymyn dep tanystyrǵan jeli qoldanýshysy Mahanova 24 mamyr kúni úzdik oqýshylarǵa maqtaý qaǵazy berilgenin, al 25 mamyr kúni saltanatty túrde sońǵy qońyraý ótkizilgenin jazǵan. «Jıynǵa kelgen oqýshylardyń barlyǵy qatysty. Eshkimge shekteý qoıylmady. Joǵarydan eshqandaı buıryq bolǵan joq»,- dep oıyn qorytyndylaǵan ol.
Sońǵy qońyraýdan soń shyqqan shýǵa qalalyq bilim bóliminiń basshysy Indıra Beksultanova da jaýap berdi.
«№55 orta mektepte sońǵy qońyraý eki kezeńmen ótkizildi. 24 mamyr kúni oqý jyly qorytyndylanyp, synyp saǵattarynda jazǵy kezeńdegi lagerler týraly aıtyldy, úzdik oqýshylar marapattaldy. Al 25 mamyr kúni túlekterge arnalǵan saltanatty shara boldy. Oǵan joǵary synyp oqýshylary qatysty. Bárine 25 mamyr kúni ǵana qońyraý soǵylý kerek degen qaǵıda joq. Kóptegen mektepter kezeń-kezeńimen ótkizedi. Bir kúnde 35-40 mınýtqa sozylatyn sharada 250-300 úzdik oqýshyny marapattaý múmkin emes», - dedi Indıra Beksultanova.
Aıta keteıik, Aqtóbe qalasyndaǵy №55 orta mektepte ótken sońǵy qońyraý sharasy oblys ákimi Berdibek Saparbaev qatysyp, túlekterge aqjol tilegen bolatyn.
