Aqtóbede keıbir ákimder memlekettik baǵdarlamalardyń ataýyn da bilmeıdi
AQTÓBE. QazAqparat - Aqtóbe oblysy «Bıznestiń jol kartasy -2020» memlekettik baǵdarlama aıasynda bıyl 1,3 mıllıon teńge ıgeredi. Degenmen shalǵaı aýyl ákimderi memlekettik baǵdarlamalardyń ataýymen de tanys emes, dep habarlaıdy QazAqparat tilshisi.
Aqtóbe oblysynda kásipkerlik basqarmasy ótken jyldy qorytyndylap, 2018 jyldyń josparymen bólisti. Bıyl «Bıznestiń jol kartasy -2020» memlekettik baǵdarlamasy aıasynda 1,3 mıllıon teńge bólinedi. Bul qarjy shaǵyn jáne orta bıznesti damytýǵa, ınfraqurylym tartýǵa baǵyttalady.
«Ótken jyly barlyǵy 21 mıllıard teńge bólindi. Sonymen qatar, ekinshi deńgeıli bankter arqyly 430 mıllıard teńge nesıe berildi. 2016 jylmen salystyrǵanda bızneske berilgen nesıe 58 paıyzǵa artyp otyr. Bul nesıe alý kásipkerlerge tıimdi ekenin bildiredi. Respýblıka boıynsha Aqtóbe úzdikterdiń qataryna ený tıis. Degenmen oblystar arasynda ótken jyly 9 orynda qaldy. Bul durys emes. Bizde jumys istep turǵan bıznes sýbektisiniń sany azaıdy, sáıkesinde shyǵarylǵan ónim qysqardy. Salyq túsimi tómendep ketti. Bıznesti tekserý kóbeıip ketti. Nátıjesi jaqsy emes»,- dedi Aqtóbe oblysynyń ákimi Berdibek Saparbaev.
Aqtóbedegi kórsetkishtiń tómendeýine sotqa aryzdanýshy kásipkerler sanynyń artýy da sebep boldy. Sońǵy jyly bıznes ıeleriniń aryzy 15 paıyzǵa artqan. Olardyń múddesin oblystyq kásipkerler palatasy qorǵap júr. Jıyn kezinde oblystyq kásipkerlik basqarmasynyń basshysy Anar Darjanova memlekettik baǵdarlamalardyń durys iske asyrylmaýyna aýdan, aýyl ákimderiniń de keri áseri bar ekenin jasyrmady.
«Keıbir ákimder memlekettik baǵdarlamanyń ataýyn bilmeıdi. Olar ataýyn bilmese, mańyzdylyǵyn túsindire almaıdy. Sondyqtan ákimderge «Bıznestiń jol kartasy - 2020» memlekettik baǵdarlamasy aıasynda qandaı ózgerister men tolyqtyrýlar engizilgeni túsindirildi. Jańa múmkindikter men memlekettik qoldaý týraly aıtyldy. Bir aıta keterligi, adamdardyń kóbi grant alýǵa kúsh salady. Grant tek bıznes jospary bar adamǵa beriledi. Bıyl memlekettik baǵdarlama aıasynda tálimger jas kásipkerdi tárbıeleıtin bolady. Biz 60 jobany tańdap alyp, olarǵa tálimger beriledi. Olar úsh kezeńnen ótedi. Sońynda 15 jeńimpaz anyqtalyp, olarǵa oblys ákiminiń 3 mıllıon teńge grantyn buıyrady»,- dedi Anar Darjanova.
