Aqtóbede keshegi atys týraly eskertýden soń oqýshylardyń 85% mektepke barmady

AQTÓBE. KAZINFORM – Aqtóbede terrorızm aktisi týraly habarlamadan soń birinshi aýysymda oqıtyn balalardyń basym bóligi sabaqqa barmaı qaldy. Olarǵa qosymsha tapsyrma berilip, sabaq onlaın ótkizildi.

Aqtóbe oblystyq bilim basqarmasynyń málimeti boıynsha, Aqtóbe qalasynda 119 mektep bar. Onyń 87-si memlekettik.

Búgin birinshi aýysymda oqıtyn 57 924 balanyń 8 558-i sabaqqa keldi. Bul — shamamen oqýshylardyń 15%. Al polıtsııa kúzetti kúsheıtti.

— Aqtóbe qalasynda jaǵdaı turaqty, alańdaýǵa negiz joq. Jalpy bilim mekemeleri shtattyq rejımde jumys istep tur. Olardyń qaýipsizdigin polıtsııa jasaqtary qamtamasyz etedi. Oqý oryndarynda, onyń ishinde beınebaqylaý júıesi arqyly qaýipsizdikti qamtamasyz etýge erekshe kóńil bólinip otyr. Jasaqtar bilim berý uıymdaryna barynsha jaqyn. Azamattardan arandatýǵa berilmeı, tek resmı aqparatqa senýdi suraımyz, — dep habarlady oblystyq PD baspasóz qyzmetiniń jetekshisi Erbolat Sarqulov.

Eske salsaq, keshe Aqtóbe qalasyndaǵy mektepterge shabýyl jasalatyny týraly habarlama tarady.

Keıin Aqtóbe oblysynyń ákimi men oblystyq PD bastyǵy mektepterdi aralap shyqty.

Keshkilik habarlama taratyp, úreý týdyrǵan 18 jastaǵy sheteldiktiń anyqtalǵany aıtyldy.