Aqtóbede kepilge alynǵan úıden eki adam qaıtys boldy

AQTÓBE. KAZINFORM - Aqtóbede túnde kepilde bolǵan úsh adamnyń ekeýi kóz jumdy.  Bireýi aýrýhanada jatyr.

Aqtóbede oblystyq PD bastyǵy sońǵy aqparatty taratty.

- Oqıǵa bolǵan jerdi zerdeleý barysynda jertólede pyshaq jaraqattarymen egde jastaǵy ata-anasy tabyldy. Ókinishke qaraı, zardap shekkenderdiń biri tasymaldaý kezinde, al ekinshisi aýrýhanada kóz jumdy. Úshinshi jábirlenýshige dárigerler barlyq qajetti medıtsınalyq kómek kórsetip jatyr. Bul fakti boıynsha qylmystyq is qozǵaldy. Kúdikti ýaqytsha ustaý ızolıatoryna qamaldy. Polıtsııa departamenti qaza tapqandardyń týystary men jaqyndaryna kóńil aıtady. Kináli adam zańnyń barlyq qatańdyǵymen jazalanatyn bolady, - dep habarlady oblystyq PD bastyǵy Abaı Júsipov.

Aıta keteıik, oqıǵa 13 qańtar kúni saǵat 20:00 shamasynda boldy. Habarlama Jedel basqarý ortalyǵyna tústi.

- Jedel tergeý toby men arnaıy bólimsheler oqıǵa ornyna dereý jetti. Jedel qyzmetter kelgen boıda bir áıeldiń kepilge alynǵany belgili boldy. Olar kúdiktimen tanys bolǵan. Bul rette kúdikti qandaı da bir talaptar qoıǵan joq. Úsh saǵattyq kelissózderden keıin jáne kúdikti kepilge alynǵan adamdy bosatý týraly talaptardy oryndaýdan bas tartqannan soń shabýyl jasaý týraly sheshim qabyldandy. Arnaıy operatsııa nátıjesinde kúdikti ustalyp, kepilge alynǵan áıel bosatyldy, - dedi Abaı Júsipov.

Eske salsaq, Aqtóbede túnde kepilde bolǵan qyz ben onyń ata-anasy bosatyldy. Kúdikti ustaldy.