Aqtóbede kepilde bolǵan kelinshek sotta oqıǵanyń mán-jaıyn aıtyp berdi
AQTÓBE. KAZINFORM — Jábirlenýshi men kúdikti buǵan deıin de tanys bolǵan. Tipti uryp-soǵyp, jábirlenýshi em qabyldaǵan. Al oqıǵa bolǵan kúni ógeı ákesin kóz aldynda óltirip, keıin polıtsııamen kelissóz júrgizgende 5 mln teńge talap etken.
Aqtóbe oblystyq qylmystyq ister jónindegi mamandandyrylǵan aýdanaralyq sotynda aıyptalýshy Sársenbek Basanovtiń isi boıynsha basty sot otyrysy bastaldy. Sottalýshy ózine taǵylǵan aıypty ishinara moıyndady. Ol óltirdi, baltamen urdy degen aıyptaýlarǵa kelispedi. Tipti óziniń balta siltegenin múlde moıyndamady.
Sotta jábirlenýshi E.Qaztýǵanova óz basynan keshken jaıtty aıtyp berdi. Onyń aıtýynsha, oqıǵa bolǵan kúni anasy men ógeı ákesi túski as iship, árqaısysy óz bólmesine ketedi. Biraz ýaqyttan soń jábirlenýshi anasyn izdep, suraıdy. Buǵan deıin esiktiń ashylyp, jabylǵanyn estigen ol anasynyń qarama-qarsy bette turatyn týysqandarynyń úıine ketip qaldy dep oılady. Keıin dalaǵa shyǵyp, jazǵy saraıdyń esigi ashyq turǵanyn kóredi. Іshke enip, jan-jaǵyna qaraı bergende ózine tanys adamnyń ustap alǵanyn kórip, syrtqa umtylady. Alaıda qashyp qutyla almaı, saraıda qalady. Sottalýshy jábirlenýshiniń aıaq-qolyn skochtap, aýzyna maılyq salyp, baılaıdy.
— Sen menen qutyldym dep oıladyń ba dedi. Keıin telefon qońyraýyna nege jaýap bermeıtinimdi, sóılespeıtinimdi surady. Úıde kim bar ekenin bilgisi keldi. Men bolsam anamdy suradym. Sebebi saraıdyń ishinen bógde eshkimdi kórmedim, daýys estimedim, qan izi bolmady. Keıin ol óz renishin aıtyp, basymnan urdy. Bir sátte ákem kirdi. Meniń janymda otyrǵan ol birden jetip baryp, pyshaq silteı bastady. Keıin baltany kórip, sonymen urdy. Ákem alǵashynda qatty qorqyp, qımyldaı almaı qaldy. Sol kezde qatty qorqyp, jan ushyra umtyldy, jedel járdem shaqyrýyn suradym. Meni alyp ketýin, olarǵa tıispeýin ótindim, — dedi sotta jábirlenýshi E.Qaztýǵanova.
Jábirlenýshi sot zalynda ógeı ákesin uryp, jertólege tastaǵanyn, qas qaraıa balasy esik ashyp, qorqyp ketkenin aıtty. Sodan keıin polıtsııa men sottalýshy arasynda kelissóz júrgen.
— Polıtsııa qyzmetkerleri kelgen kezde ol kúrt ózgerdi. Jyn kirip ketti dep aıtty, daýysyn da ózgertip sóılesti. Polıtsııa qyzmetkerlerine 5 mln teńge berejaq ekenimdi aıtty. Olar beremiz dedi, biraq bul kerek emes dep kelispedi. Kelissóz jalǵasyp, temeki, energetık sýsynyn surady. Birneshe ýaqyttan keıin jarylys estidim. Qarańǵyda men bir adam ustap aldy. Ol polıtsııa qyzmetkeri eken, — dedi jábirlenýshi.
Sotta marqum B.Álıevtiń qyzy Anar Tájimuhanova da kórip-bilgenin aıtty. Onyń málimetine súıensek, alǵashynda anasy men ákesin ózge páterde ustap otyrǵanyn aıtyp sendirgen. Sol kúni saǵat 19:00–de bastalǵan kelissóz túngi 01:00–ge deıin jalǵasyp, erli-zaıypty jertólede mert boldy.
— «Ata-anamyz qaıda» dep biz shyryldap júrdik. Olardy páterde ustap otyr degendi estigende tiri eken dep úmittendik. Esikti túngi saǵat 01:00–den keıin ǵana ashty. Bul pyshaqtap, baltalaǵanymen qoımaı, birneshe saǵatqa jaýyp qoıdy. Kómek kórsetýge múmkindik bermedi, — dedi jábirlenýshi Anar Tájimuhanova.
Sot otyrysynda jábirlenýshi tarap azamattyq talap aryz túsirdi. Sottalýshy S. Basanovtan 50 mln teńge moraldyq, 8 504 500 teńge materıaldyq shyǵyndy óteýdi talap etti.
Eske salsaq, bıyl 13 qańtar kúni Aqtóbede er adam áıeldi kepilge aldy. Oqıǵa ornynda bolǵan úsh adamnyń ekeýi kóz jumdy. Bireýi aýrýhanaǵa tústi. Birden qylmystyq is qozǵalyp, tergeý júrdi. Kepilde bolǵan áıel birneshe kún aýrýhanada em qabyldady. Eki apta buryn sot aldy tyńdaýy ótip, aıyptalýshyǵa Qylmystyq kodekstiń «Adam óltirý», «Bas bostandyǵynan zańsyz aıyrý», «Densaýlyqqa qasaqana aýyrlyǵy ortasha zııan keltirý» baptary boıynsha aıyp taǵyldy.