Aqtóbede kepilge alynǵan stomatologııa ákimshisin qutqarý kezinde turǵyndar qaýipsiz jerge kóshirilmedi
AQTÓBE. QazAqparat - Aqtóbede quqyq qorǵaýshylar arnaıy operatsııa kezinde 6 qabatty úıdiń turǵyndaryn qaýipsiz jerge kóshirmegen. Tipti, joǵary qabatta turatyn adamdar estimegen, kórmegen, dep habarlaıdy QazAqparat tilshisi.
Keshe túnde 24 jastaǵy Abylaı Tileýov «Jemchýg+» stomatologııalyq klınıkasynyń ákimshisin kepilge alyp, áıelin ákelýdi talap etken bolatyn. Polıtsııa qyzmetkerleri men prokýrorlar 5 saǵat kelissóz júrgizip, A.Tileýovti raıynan qaıtara almaǵan soń arnaıy operatsııa júrgizgen. Ol oqıǵa ornynda kóz jumdy.
«Oqıǵa keshe keshki saǵat 7-de bolǵan sııaqty. Alǵashynda sırena daýysy qatty shyqty. Al polıtsııa qyzmetkerleri kelgen soń tek jaryǵy janyp turdy. Sodan soń eshqandaı dybys estilmedi. Árıne, qorqynyshty. Biz túni boıy kóz ilgen joqpyz. Ári jas balany aıap turmyz. Onyń bar ómiri alda edi»,- dedi turǵyn Vera Pesrıan.
Al stomatologııalyq klınıkamen kórshi ornalasqan «Olımp» dıagnostıkalyq zerthanasynyń qyzmetkerleri keshke bir qyzdyń júgirip shyǵyp, «polıtsııa shaqyryńdar» degenin estigen. Sol kezde Ákimshilik polıtsııa basqarmasyndaǵy quqyq qorǵaýshylar tez jetken. Aıta keteıik, arnaıy operatsııa kezinde 6 qabatty úıdiń turǵyndary qaýipsiz jerge kóshirilmegen. Sol kezde úıinde bolǵan turǵyndar oqıǵanyń mán-jaıyn tek búgin tańerteń bir bilgen.
Oblystyq ishki ister departamenti taratqan málimetke súıensek, Abylaı Tileýov pyshaq jaraqatyn salǵan burynǵy áıeliniń 47 jastaǵy anasy medıtsınalyq kómek almaǵan. Ol jedel járdem shaqyrmaǵan, eshqandaı aýrýhanaǵa túspegen.
Eske salsaq, naýryzdyń 14-nen 15-ne qaraǵan túni Aqtóbede kepilge alǵan stomatologııa ákimshisin qutqarý operatsııasy júrdi. Oqıǵa ornynda 24 jastaǵy qylmyskerdiń kózi joıyldy.
