Aqtóbede kenshini bopsalaǵan jattyqtyrýshy ustaldy
AQTÓBE. KAZINFORM — Polıtsııa birden eki is boıynsha kúdiktilerdi ustady. Birinde jattyqtyrýshy kenshini bopsalady. Ekinshi jaǵdaıda Aqtóbe qalasynyń turǵyny ıntımdik sıpattaǵy beınejazbany tanystaryna kórsetetinin aıtyp, qorqytqan.
Aqtóbe oblystyq PD baspasóz qyzmetiniń habarlaýynsha, oqıǵanyń biri Hromtaý qalasynda boldy. Jeke sport klýbynyń jattyqtyrýshy óziniń tanysyn qorqytyp, 500 000 teńge talap etken.
— Jattyqtyrýshy men kenshi burynnan tanys bolǵan. Soǵan qaramastan sportshy odan esh sebepsiz jarty mıllıon teńge talap etken. Suraǵan aqshasyn bermese, ómirin qııatynyn aıtyp bopsalaǵan. Ekinshi jaǵdaıda Aqtóbe qalasynyń turǵyny óziniń burynǵy tanysynyń ıntımdik sıpattaǵy beınejazbasyn jarııalap jiberetinin aıtyp, qorqytqan. Kúdikti buryn jaqyn qarym-qatynasta bolǵan áıelden 700 myń teńge aqsha talap etken. Uıymdasqan qylmysqa qarsy kúres basqarmasynyń qyzmetkerleri júrgizgen arnaıy operatsııa barysynda eki er adamdy da jábirlenýshilerden aqsha alý kezinde ustady, — dep habarlady Aqtóbe oblystyq PD baspasóz qyzmeti.
Eki kúdikti de ýaqytsha ustaý ızolıatoryna qamaldy. Qylmystyq kodekstiń «Bopsalaý» deregi boıynsha sotqa deıingi tergep-tekserý júrgizilip jatyr. Eger kúdiktilerdiń kinási dáleldense, múlki tárkilenip, 4 jylǵa deıin bas bostandyǵynan aıyrylýy múmkin.
Buǵan deıin Aqtóbede bopsalaý jáne tonaýmen aınalysqan 7 kúdikti ustaldy.
