Aqtóbede keńselerge ekoboks qoıyla bastady
AQTÓBE. QazAqparat – Keńsedegi qaǵaz, plastıkalyq ydys pen áınek bólek jınalady. Jınalǵan qoqys arnaıy óńdeý ornyna tapsyrylyp, túsken aqsha keńse ıesine qaıtarylady, dep habarlaıdy QazAqparat tilshisi.
Almaty, Nur–Sultan qalasyndaǵy iri keńselerde qazir qaǵaz ben plastıkalyq ydys, áınek bólek jınalyp jatyr. Ekologııany qoldaıtyn top bul qyzmetti Aqtóbe qalasyna da engizbek.
«Jyl basynda qolǵa alynyp, biz 30 tonna qoqysty óńdeýge jiberip úlgerdik. Bul az, degenmen osy jolmen adamdarǵa qorshaǵan ortany qorǵaý mádenıetin úıretkimiz keledi. Máselen, keńsede otyrǵan adam qoqysqa qaǵaz tastaıdy, sý ishkende plastıkalyq ydystar da shyǵady. Qazir bárin bir paketke salyp, laqtyryp jatyrmyz. Ol polıgonǵa jetkiziledi, óńdelmeıdi. Sondyqtan keńsede ekoboks qoıyp, suryptap, arnaıy óńdeý tsehtaryna jiberip otyrmyz. Aqtóbeniń ózinde qaǵaz, plastıka, áınek qabyldaıtyn oryndar bar. Plastıkadan qubyr jasalsa, kádimgi kólik dońǵalaǵynan balalardyń oıyn alańyna tósenish daıyndalady», - dedi joba ókili Aıman Seksenova.
Qazir Aqtóbede iri munaı kompanııalary keńselerine ekoboks qoıdy. Respýblıka boıynsha barlyǵy 46 kompanııa seriktes bolýǵa kelisken. Olardyń arasynda ekinshi deńgeıli bankter, saýda oryndary da bar.
«Jumyrtqanyń qaǵaz qoraby, kofeniń ydysy men lamınattalǵan qaǵaz, dúkenderde beretin chek, qaǵaz aqsha qaıta óńdeýge jatpaıdy. Ózgesi óńdelip, ájethana qaǵazy, qol súrtetin qaǵaz maılyq bola alady. Máselen, jyl basynan beri osy arqyly 214 aǵash kesilmedi, 427 myń lıtr sý, 21 myń saǵ/Vt jaryq únemdeldi dep aıta alamyz. Aqtóbe qalasynda qoqys óte kóp. Ony tazalaý úshin ár adam atsalysyp, kómek qolyn sozǵan jón», - dedi Aıman Seksenova.
