Aqtóbede kelinshekti kepilge alǵan sottalýshy ómir boıyna bas bostandyǵynan aıyrylýy múmkin

AQTÓBE. KAZINFORM – Prokýror jaryssóz kezinde sottalýshy S.Basanovty kináli dep tanyp, túpkilikti ómir boıyna bas bostandyǵynan aıyrýdy surady. Búgin keshke sot úkimi oqylady.

Aqtóbe oblystyq qylmystyq ister jónindegi mamandandyrylǵan aýdanaralyq sotynda sottalýshy S.Basanovqa qatysty is boıynsha jaryssóz ótti. Prokýror Gúlzıra Kósherbaeva sot otyrysy kezinde S.Basanovtyń kánisi tolyq dáleldendi dep sanaıdy.

Onyń aıtýynsha, kýágerlerdiń jaýaby, jábirlenýshilerdiń sózi, saraptamalardyń qorytyndysy oǵan dálel. 

- Basanovtyń kinási tolyqtaı dáleldenip, durys saralanǵan dep esepteımin. Sottalýshynyń is-áreketi asa aýyr qylmystar sanatyna jatady. Basanovtyń kinásin jeńildetetin mán-jaılar joq. Basanov psıhıatr, narkologtiń esebinde turmady. Sol kúni mas emes, saý bolǵan. Qandaı da psıhıkalyq buzýshylyqqa shaldyqpaǵan. Affekt jaǵdaıynda bolǵan joq. Qylmystyq kodekstiń 99 baby 2 bóligi 1, 3, 5 tarmaqtary, 126 baby 2 bóligi 3, 4 tarmaqtarymen, 107 baby 1 bóligimen kináli dep tanyp, túpkilikti ómir boıyna bas bostandyǵynan aıyrýdy suraımyn.

Jábirlenýshilerdiń talap aryzyn tolyq qanaǵattandyryp, moraldyq jáne materıaldyq zalaldy óndirýdi suraımyn,- dedi prokýror Gúlzıra Kósherbaeva. Jábirlenýshiler memlekettik aıyptaýshyny qoldady. 

Jaryssóz kezinde sottalýshy S.Basanov anasy men kishkentaı balasy bar ekenin, ómir boıyna bas bostandyǵynan aıyrmaýdy surady. 

- Men ondaı qatygez adam emespin. Kóptegen arman bolyp edi. Otbasyn quryp, baqytty ómir súrgim keldi. Jalǵyz anashym bar. Ol da keshe kelip ketti. Endi kóre almaıtyn shyǵarmyn dedi. Jazany jeńildetýdi suraımyn. Meniń de ómir súrgim keledi. Kishkentaı balam bar, oǵan tárbıe bergim keledi,- dedi sottalýshy S.Basanov. 

Sot búgin saǵat 17:30-da úkim shyǵarady. 

Eske salsaq, bıyl 13 qańtar kúni Aqtóbede er adam áıeldi kepilge aldy. Oqıǵa ornynda bolǵan úsh adamnyń ekeýi kóz jumdy.

Bireýi aýrýhanaǵa tústi. Birden qylmystyq is qozǵalyp, tergeý júrdi.

Kepilde bolǵan áıel birneshe kún aýrýhanada em qabyldady.

Eki apta buryn sot aldy tyńdaýy ótip, aıyptalýshyǵa Qylmystyq kodekstiń «Adam óltirý», «Bas bostandyǵynan zańsyz aıyrý», «Densaýlyqqa qasaqana aýyrlyǵy ortasha zııan keltirý» baptary boıynsha aıyp taǵyldy.

Sotta jábirlenýshi, kepilde bolǵan kelinshek óz nusqasyn, sonymen birge sottalýshy óz nusqasyn aıtty. Sottalýshy S.Basanov taǵylǵan aıypty ishinara moıyndady.