Aqtóbede «Qazposhta» operatory balalarǵa tıesili alımentti qymqyrǵan

AQTÓBE. QazAqparat – Aqtóbe qalasy Almaty aýdandyq prokýratýrasy alımentti jymqyrǵan «Qazposhta» operatorynyń isin áshkereledi, dep habarlaıdy QazAqparat tilshisi.

Alıment óndirý isiniń zańdylyǵyn teksergen prokýrorlar aýdarylǵan aqshanyń ıesine jetpegenin anyqtady.

«Aqtóbe qalalyq sotynyń 2017 jylǵy sheshimin oryndaǵan áke eki balasyna 70 myń teńge aýdarǵan. Alaıda aqshany «Qazposhta» AQ fılıalynyń operatorlary jarty joldan jymqyryp, óz qajetine jumsaǵan. Aqsha aýdarý operatsııasyn júrgizgen operator sol jolmen 6 adamnyń 400 myń teńgeden astam qarjysyn alyp qalǵan», - dep habarlady áleýmettik jeli arqyly Aqtóbe qalasy Almaty aýdandyq prokýrory Jasulan Dáýlembaev.

«Qazposhta» AQ fılıaly ishki tekserý júrgizip, mán-jaıdy anyqtaǵan soń polıtsııaǵa aryz túsirgen. Alaıda polıtsııa azamattyq-quqyqtyq isti tergeýden bas tartyp, máselege Almaty aýdandyq prokýratýrasy aralasty.

Tergeý kezinde urlanǵan aqsha ıesine tolyq qaıtarylyp, jábirlenýshi men kúdikti tatýlasty, is qysqartyldy.