Aqtóbede Qazaqstannyń Halyq qaharmany men Eńbek erleriniń qatysýymen konferentsııa ótti
AQTÓBE. KAZINFORM — Halyq Qaharmandary men Qazaqstan Eńbek Erleriniń ІV konferentsııasyna qatysý úshin Aqtóbege elimizdiń ár óńirinen kórnekti qazaqstandyqtar – «Halyq Qaharmany» jáne «Qazaqstannyń Eńbek Eri» joǵary ataǵyn ıelengender keldi.
Іs-shara Keńes odaǵynyń Batyry Álııa Moldaǵulovanyń týǵanyna 100 jyl tolýyna oraı uıymdastyryldy.
Aımaq basshysy Ashat Shaharov konferentsııaǵa qatysýshylardy quttyqtap, kórnekti tulǵalardyń erligi men janqııarlyq eńbegi týraly estelikterdi saqtaýdyń mańyzdylyǵyn ári onyń óskeleń urpaqty tárbıeleýde zor máni bar ekenin atap ótti.
«Árbir Halyq qaharmany men Qazaqstannyń eńbek eri – elge adal qyzmet etýdiń, qaısarlyq pen tabandylyqtyń jarqyn úlgisi. Olar óz eńbegimen, erligimen búkil halyqtyń júreginen oryn alyp, el maqtanyshyna aınaldy. Osyndaı ardaqty azamattardyń ómir joly — jas urpaq úshin ulaǵatty tárbıe mektebi. Eliniń ar-namysyn bárinen bıik qoıǵan, halqy úshin aıanbaı ter tókken barsha azamattarǵa shyn júrekten alǵys bildiremin. Eliniń ar-namysyn bárinen bıik qoıǵan, halqy úshin aıanbaı ter tókken barsha azamattarǵa shyn júrekten alǵys bildiremin. Sizderdiń erligińiz, eńbekterińiz — el jadynda, urpaq esinde máńgi saqtalady», - dedi óz sózinde oblys ákimi.
Ashat Shaharov sondaı-aq Forýmnyń mán-mańyzyna toqtalyp, mundaı kezdesýler jastardyń jaýapkershilik sezimin, eńbekke degen qurmetin, Otanǵa degen súıispenshiligin tárbıeleýge jáne ulttyq sana-sezimdi nyǵaıtýǵa yqpal etetinin atap ótti.
Konferentsııaǵa kelgen mártebeli meımandar qatarynda «Halyq Qaharmany», general-leıtenant Baqytjan Ertaev, «Qazaqstannyń eńbek eri», medıtsına ǵylymdarynyń doktory Serik Aqsholaqov, Qazaqstannyń Pedagogıka Ǵylymdary Akademııasynyń akademıgi, «Qazaqstannyń Eńbek Eri» ataǵyna ıe bolǵan alǵashqy áıel Aıagúl Mırazova, «Qazaqstannyń Eńbek Eri» Murat Qaıyrgeldın jáne ózgeler bar.
Qatysýshylar jastarǵa patrıottyq tárbıe berýdiń, urpaqtar sabaqtastyǵynyń, eńbektegi erliktiń qazirgi qoǵamdaǵy róli sekildi mańyzdy máselelerdi talqylady. Álııa Moldaǵulova sekildi batyr jerlesteriniń murasyna erekshe kóńil bóldi.
Ulttyq neırohırýrgııa ortalyǵynyń prezıdenti, Qazaqstannyń eńbek eri Serik Aqsholaqov óz sózinde mundaı kezdesýlerdiń jas urpaqqa berer tárbıesine toqtaldy.
«Biz ata-babalarymyzdyń erligin, ásirese Jeńistiń 80 jyldyǵynda umytpaýymyz kerek. Búgingi jastar Álııa Moldaǵulova sııaqty batyrlardyń mysaldarynda ósip-ónýi tıis, olardyń esimi árbir qazaqstandyq úshin ardaqty. Aqtóbe óńirinen kóptegen kórnekti tulǵalar shyqty. Aǵa býynnyń mindeti – osy moraldyq kúshti, patrıotızm rýhyn, eńbek pen bilimge degen umtylysta jas urpaqqa jetkizý», - dedi Serik Aqsholaqov.
Qazaqstannyń Eńbek Eri, «Qurmet» ordeniniń ıegeri, «Táýelsiz Qazaqstannyń Halyq qaharmandary» RQB oblystyq fılıalynyń tóraǵasy Quralaı Baımenova konferentsııany tarıhı shara dep atady.
«Aqtóbe úshin bul konferentsııany ótkizý – úlken mártebe, bul tarıhı mańyzdy oqıǵa. Búgin munda «Qazaqstannyń Eńbek Eri» sekildi eń joǵary ataqtyń ıegerleri jınaldy. Olardyń ishinde kenshiler, muǵalimder, dárigerler men agrarshylar bar. Olardyń árqaısysy eldiń damýyna zor úles qosty. Bul adamdar naǵyz eńbek erleri, ar-namys qaharmandary. Eger halyq pen Otanǵa shyn júrekten qyzmet etse, adam osyndaı bola alady», - dedi Quralaı Baımenova.
Konferentsııa aıasynda eńbek áýletterin qoldaý, kásipterdi tanymal etý, urpaqtar baılanysyn nyǵaıtý jáne bilim berýde patrıottyq baǵdarlamalardy engizý qajettiligi aıtyldy.
Jastar atynan sóz alǵan «Atameken» stýdenttik jasaǵynyń jastar qoǵamdyq birlestiginiń tóraǵasy Nurjan Shańǵytbaev batyrlarǵa ózderiniń eńbek jáne ómirlik erlikteri úshin rızashylyǵyn bildirip, osyndaı tulǵalardyń isi jas qazaqstandyqtardyń joǵary maqsattarǵa umtylýyna, óz eline abyroımen qyzmet etýine zor shabyt beretinin alǵa tartty.
«Bizge, ıaǵnı jastar úshin sizder sekildi tarıhı tulǵalarmen kezdesýdiń ózi úlken mártebe, ári zor jaýapkershilik. Búgin ortamyzda otyrǵan aǵa-apalarymyzdyń árqaısysynyń ómir joly ónegege toly, eline adal qyzmet etip, erligimen de, eńbegimen de tanylǵan jandar. Sizderdiń ónegeli ómir joldaryńyz, elge sińirgen eńbekterińiz –bizge, óskeleń urpaqqa úlgi jáne bolashaqqa baǵyt-baǵdar bolatyny aıqyn. Óńirde resýrstyq ortalyqtar jumys isteıdi, «Aqtobe Jastary» jáne «Jasyl el» sııaqty mańyzdy jobalar iske asyrylýda. Jumysshy mamandyqtar jyly eńbek bedeli men jańa jetistikterdi arttyrýǵa qýatty yntalandyrý bolatynyna senimdimin», - dedi Nurjan Shańǵytbaev.
Qurmetti meımandar Keńes Odaǵynyń Batyry Álııa Moldaǵulovanyń memorıaldyq keshenine gúl shoqtaryn qoıyp, batyr rýhyna taǵzym etti. Á. Moldaǵulovanyń oblystyq memorıaldyq murajaıyna ekskýrsııa da uıymdastyryldy. Sondaı-aq, T. Begeldınov atyndaǵy Áýe qorǵanysy kúshteri Áskerı ınstıtýtynyń kýrsanttarymen jáne áskerı qyzmetshilerimen júzdesip, óz aqyl-keńesterimen bólisti.
Aıta keteıik, Aqtóbede qurylysy aıaqtalmaı turǵan 11 problemalyq nysan bar.