Aqtóbede Qazaqstan-Izraıl bıznes forýmy ótip jatyr
AQTÓBE. QazAqparat - Aqtóbede Qazaqstan-Izraıl bıznes forýmy bastaldy. Forýmǵa oblys ákimi Berdibek Saparbaev pen Izraıldiń Qazaqstandaǵy Tótenshe jáne Ókiletti elshisi Mıhael Brodskıı, sondaı-aq eki eldiń kásipkerleri qatysyp jatyr, dep habarlaıdy QazAqparat tilshisi.
Qazaqstan men Izraıldiń saýda-ekonomıkalyq qarym-qatynasyn damytý maqsatynda Aqtóbede bıznes forým bastaldy. Forýmǵa aýyl sharýashylyǵy kesheni, medıtsına, jasyl ekonomıka, ónerkásip, aqparattyq tehnologııa jáne taǵy da basqa salalardyń ızraıldik jáne aqtóbelik kompanııa basshylary qatysyp jatyr. Aqtóbe oblys ákimi Berdibek Saparbaevtyń aıtýynsha, táýelsizdik jyldarynda Qazaqstan men Izraıldiń arasyndaǵy yntymaqtastyq turaqty damyp keledi. Qazirgi ýaqytta elimizde ızraıldik ınvestorlardyń qatysýymen 270 kásiporyn jumys istep tur. Qarym-qatynas qurylys, munaı-gaz, metallýrgııa, taý ken jáne óńdeý ónerkásibi, farmatsevtıka jáne saýda salasynda jaqsy damyǵan. 2016 jyly Aqtóbe oblysy men Izraıl arasyndaǵy taýar aınalymy 63,1 myń AQSh dollaryna jetip, óńirge kókónis, tsıtrýsty, keptirilgen jemis, sonymen qatar plastmassadan jasalǵan buıymdar jetkizilgen.
«Aqtóbeniń jer qoınaýy óte baı. Óńirde Mendeleev kestesindegi metaldyń barlyq túri kezdesedi. «SNPS-Aqtóbemunaıgaz» AQ, «Qazhrom» TUK» AQ, «Rýskaıa mednaıa kompanııa» JShS sekildi iri úsh kompanııa turaqty jumys istep tur. Ári Aqtóbe Batys Qytaı-Batys Eýropa halyqaralyq dálizinde ornalasqan, Eýropa men Azııanyń qaqpasy. Geografııalyq ornalasqan jeri ónimdi tasymaldaý kezinde óte yńǵaıly. Ári bizde kásipkerlerge arnalǵan Indýstrııaldy aımaq bar. Aýmaǵy 200 gektar bolatyn jerge barlyq ınfraqurylym tartylǵan. Temir jol, tas jol, elektr togy jetkizilip, sý qubyry tartyldy. Aımaqta Kásipkerlerge qyzmet kórsetý ortalyǵy jumys isteıdi», - dedi oblys ákimi Berdibek Saparbaev. Forým kezinde ótken jyly bolǵan lańkestik oqıǵaǵa qaramastan óńirde turaqtylyq saqtalǵanyn, ınvestorlar úshin elde qaýipsizdik qamtamasyz etiletinin jetkizdi.
Forým kezinde oblys ákimi B.Saparbaev eki el dárigerleriniń arasynda sheberlik sabaqtary ótizilip, birlesken ota jasaýdy jolǵa qoıýdy usyndy. Medıtsınalyq klaster qurý jumystary bastalǵan kezde óńirde Ońtústik Koreıa dárigerlermen birlese 6 baýyr, 18 búırek aýystyrý otasy jasaldy. Aldaǵy ýaqytta aqtóbelikter Almaty men Astanaǵa baryp emdelýdi toqtatyp, Reseı men Ózbekstannyń naýqastaryn emdeý múmkindigi jasalady. Bul jumysty iske asyrý úshin aqtóbelikter ızraıldik dárigerlerdiń de kómegine júginbek.
