NUR-SULTAN. QazAqparat - Búgin Aqtóbe qalasynda qazaq kúresinen álem chempıonaty máresine jetti. Qazaqstandyq balýandar bes salmaqta chempıon atandy, dep habarlaıdy QazAqparat tilshisi.
Búgin álem chempıonatynda qazaqstandyq úsh balýan synǵa tústi. Olardyń qatarynda Qýanysh Ysqaqov (66 keli), Aıdos Ǵalymov (74 keli) jáne Ábdiqasym Sahan (82 keli) boz kilemge shyqty. Aıta keterligi, úsh balýanymyz da fınalǵa jetti. Qýanysh Ysqaqov aqtyq synda mońǵolııalyq Batzaıa Erdenebaıardy jeńdi. Al Aıdos Ǵalymov grýzııalyq Elgýdja Barbakadzeniń jaýyrynyn jerge tıgizdi. Al Ábdiqasym Sahan fınalda reseılik Aram Grıgorıanǵa jol berip qoıdy. Túıe balýandar saıysynda ózbekstandyq Mýhsın Hısomıdınov jeńimpaz atandy. Esterińizge sala ketelik, álem chempıonatynda Dáýlet Nıetbaı (55 keli), Nurym Sálimgereev (100 keli) jáne Rýslan Ábdirazaqov (100 keliden joǵary) «altynnan» alqa taqty. Sondaı-aq, Erjan Erenqaıypov (60 keli) pen Ádiljan Ystybaev (90 keli) qola júldeger boldy. Álem chempıonatyna dúnıejúziniń 40-tan astam eliniń sportshylary qatysty. Olardyń qatarynda Ýkraına, Grýzııa, Avstrııa, Norvegııa, Estonııa, Frantsııa, Irlandııa, Germanııa, Pákistan, Ózbekstan, Iran, Ulybrıtanııa, Qyrǵyzstan, Úndistan, Lıtva, Slovenııa, Reseıden kelgen balýandar bar. Balýandar 8 salmaq dárejesinde beldesti. Chempıonatta Ýkraına, Reseı, Qyrǵyzstan, Tájikstan, Grýzııa, Lıtva jáne Armenııa memleketterinen 8 jáne elimizden 12 tóreshi qazylyq etti.
