Aqtóbede qazaq halqyna alǵys retinde músindik kompozıtsııa ornatyldy
Músindik kompozıtsııa Tuńǵysh Prezıdent atyndaǵy ortalyq saıabaqtaǵy Týtuǵyr mańyna ornatyldy.
Sharaǵa oblys ákimi Ońdasyn Orazalın, Qazaqstan halqy Assambleıasy tóraǵasynyń orynbasary Marat Ázilhanov, etno-mádenı birlestikterdiń tóraǵalary qatysty.
«Osydan 85 jyl buryn kárister Qıyr Shyǵysta poıyzǵa otyrǵyzylyp, Qazaqstanǵa kúshtep qonys aýdaryldy. Sol kezde Qazaqstan halqy qıyn jaǵdaıda bolǵanymen, káristerge baspana, kıim-keshek, azyq-túlik jaǵynan kómek qolyn sozyp, olardy jaqyn kórshi, otbasy múshesi retinde qarsy aldy. Sol kúnderi qoldaý bildirgen jandardyń qurmetine búgin músindik kompozıtsııa ornatyldy», - dep atap ótti Koreıa Respýblıkasynyń Qazaqstandaǵy Tótenshe jáne Ókiletti Elshisi Ký Hong Sok.
Óz kezeginde oblys ákimi de óz rızashylyǵyn bildirdi.
«Alǵys aıtý kúni – qazaqstandyqtardan qoldaý tapqan meıirimdiliktiń, ózara syılastyqtyń, dostyq pen yntymaqtastyqtyń merekesi.
Aqtóbe oblysynda Alǵys aıtý kúni bolǵan jarqyn oqıǵa – atalmysh eskertkishtiń ashylýy. Bul bizdiń halyqqa degen shynaıy rızashylyqtyń kýási. Qurmetti elshi, Aqtóbe óńiriniń turǵyndary atynan sizge jáne siz arqyly Koreıa Respýblıkasynyń búkil halqyna alǵysymdy bildiremin», - dedi oblys ákimi Ońdasyn Orazalın.
Jınalǵandardy Alǵys aıtý kúnimen Qazaqstan halqy Assambleıasy tóraǵasynyń orynbasary Marat Ázilhanov ta quttyqtap, Qazaqstan halqy Assambleıasy men etnomádenı birlestikterdiń birqatar múshesin marapattady.
«Aqtóbe oblysynyń káristeri atynan qazaq halqyna alǵys» músindik kompozıtsııasynda qazaq jáne káris áıelderiniń músinderi beınelengen. Qazaq áıeli káris áıeline qonaqjaılylyqtyń belgisi retinde kesemen qymyz usynyp tur. Al shańyraqty ustap turǵan qustyń qos qanaty tatýlyqtyń belgisi ispetti. Kompozıtsııanyń jalpy bıiktigi – 4,7 metr, eni – 4,5 metr.
