Aqtóbede qaza bolǵan jylqyshynyń balasy tergeýge kúmán keltirdi
AQTÓBE. QazAqparat - Aqtóbede qaza bolǵan jylqyshylardyń ekeýi ákeli-balaly baqtashy bolǵan. Oqıǵa bolǵan kúni olardyń aty-jónderi áleýmettik jeli arqyly tarap, Іshki ister organdary qylmysqa qatysy bar degen kúdikpen ekeýine izdeý jarııalady, dep habarlaıdy QazAqparat tilshisi.
Aqtóbe oblysy, Baıǵanın aýdany, Qyzylbulaq aýyldyq okrýginde 14 aqpan kúni úsh jylqyshynyń múrdesi tabyldy. Olardyń ekeýi ákeli-balaly. 67 jastaǵy Bolat Buharbaev pen 24 jastaǵy Qojahmet Murat alǵashqy kezde jábirlenýshilerdiń emes, qylmyskerlerdiń qataryna qosylyp ketken. Sebebi, ákeli-balaly eki adamnyń aty-jónderi týraly aqparat Іshki ister organdarynyń kúdiktilerdi izdeý baǵyttamasynda júripti. Bul aqparatty kórgen aqtóbelik Raıymbek Áıtekenov birden tergeýge kúmán keltirdi. Onyń aıtýynsha, qaza bolǵandardyń biri - onyń ákesi, ekinshisi - týǵan inisi.
«Kemershı aýylyndaǵy maldy aýylda bárimiz jumys istedik. Biraq men qosymsha vahtalyq ádispen eńbek ettim. Ákem men inim sol jerde jylqy baqty, jumys istedi. Men jumysta júrgende qaryndasym telefon shalyp, jylady. Keıin jaqyn aǵamyz mán-jaıdy túsindirdi. Aýylǵa kelip, ne jaǵdaı dep surasaq, sol kezde «ákeń qashyp ketti» dep aıtty. Ol qashpaǵan. Bilýimizshe maldy qaraýǵa ketip bara jatqan kezde artqy jaǵynan eki ret atqan. Birden taba almaǵan soń polıtsııa qyzmetkerleri «qashyp ketti» dep izdeýge salǵan. Nege olar bárin tergep, teksermeı izdeý salady?», - deıdi R.Áıtekenov.
R.Áıtekenovtiń aıtýynsha, Bolat Buharbaev pen Qojahmet Murattyń aty-jónderin «kúdiktiler tiziminen aldyq» dep aıtyp, jábirlenýshi tarapqa habar bergen. Biraq kúmán áli seıilmeı otyr.
Aıta keteıik, oblystyq Іshki ister departamentiniń baspasóz qyzmeti 14 aqpan kúni qylmystyq oqıǵa bolǵanyn rastady. Qazirgi ýaqytta 42 jastaǵy kúdikti qamaýda otyr . Tergeý jumystary jalǵasyp jatyr.
