Aqtóbede qaza bolǵan polıtsııa qyzmetkerin aqtyq saparǵa shyǵaryp saldy

Eki balanyń ákesi Baıbek Qarymsaqov 8 qańtar kúni ákimdik janyndaǵy ótkizý beketinde óz-ózine qol jumsaǵan bolatyn. ІІM Aqtóbe oblystyq mamandandyrylǵan kúzet qyzmeti basqarmasy oqıǵaǵa baılanysty qylmystyq is qozǵalǵanyn habarlap, saraptama taǵaıyndalǵanyn málimdegen bolatyn.

Búgin aqtóbelikter polıtsııa qyzmetkerin aqtyq saparǵa shyǵaryp saldy.



«Baıbek jumysyna adal, aqkóńil, úlkenge qurmet kórsetip, kishige qamqor bola bilgen adam. Ol ózine sendi, bilimimen ofıtserlik sanatqa ótti. Jazda kishi leıtenant shenine ıe boldy. Kúıeýimniń óz-ózine qol jumsaǵanyna sene almaımyn.

«Ol qulaǵynyń túbinen taqap atqan, basynan shyqqan» deıdi. Biraq arnaıy ótkizý beketiniń ishin kóre almadyq. Onyń terezesi de synbaǵan. Sol kúni ol maǵan telefon shalyp, habarlasty. Kún saıyn saǵat 15:00-de ishki tekserý bolady. Al inisimen saǵat 16:00-de habarlasyp turǵan. Sol kezde ol júgirgen adamdaı jıi tynystap turǵan. Oqıǵa da sol kezde tirkelgen eken. Al bizge túngi saǵat 21:00-de habar berdi. Sondyqtan men iske kúmándanyp, sotqa berýge sheshim qabyldadym. Artynda qalǵan eki balasy úshin moraldyq, materıaldyq shyǵyn talap etemin»,- dedi marqum Baıbek Qarymsaqovtyń jubaıy Baǵdagúl Ermekqyzy.


Aıta keteıik, Qarymsaqovtar otbasynyń músheleri baýyrlarynyń polıtsııa qatarynan ketýdi oılaǵanyn jasyrmady. Birde kúndiz, birde túni boıy kúzetke shyǵatyn Baıbek Qarymsaqov otbasy jaǵdaıyna baılanysty, densaýlyǵyna oraı jumysynan suranyp kórmepti.

«Kúıeýimniń suraýy, izdeýi joq dep eshkim oılamasyn. Men polıtsııa salasyndaǵy birneshe zańsyzdyqty aıtyp, sotqa shaǵym túsiremin. Eki balam úshin bárin jasaımyn»,- dedi Baǵdagúl Ermekqyzy.

Qazirgi ýaqytta tergeý júrip jatyr. Qylmystyq kodekstiń «Ózin-ózi óltirýge deıin jetkizý» baby boıynsha is qozǵaldy.