Aqtóbede qaıyrymdy jandar aqsha jınap, muqtaj otbasyna páter syılady
AQTÓBE. QazAqparat - Aqtóbe oblysynda «El úlesi - páterge» qaıyrymdylyq sharasy júrip jatyr. Búgin jınalǵan qarjyǵa alǵashqy baspana berildi, dep habarlaıdy QazAqparat tilshisi.
QMDB-nyń Aqtóbe oblysy boıynsha ókildigi jáne «Zeket» qory «El úlesi - páterge» jobasyn bastady. Asa muqtaj jandar úshin baspanaǵa qarjy jınalady. Aqsha jınaý úshin jastar men oblys turǵyndary arnaıy jármeńke uıymdastyryp, óz qoldarymen ázirlegen taǵamdaryn, turmystyq buıymdardy satty. Búgin alǵashqy qýanysh ıesi belgili boldy. Tańdaý Aqtóbe oblysyndaǵy Embi qalasynda turatyn Ádilbek Rahmetalınge tústi. ІІІ top múgedegi bir ul, eki qyz tárbıelep otyr.
«Kópbalaly, muqtaj otbasylarǵa kómek berýdiń eń tıimdi, utqyr tusy osy dep esepteımiz. Kez kelgen adam baspanaly bolýdy armandaıdy. Sol armandy oryndaý úshin biz arnaıy «El úlesi - páterge» jobasyn qolǵa aldyq. Bul iske aqsha tıyndap jınalyp, páter alýǵa jetti. Qoldaý bildirgen ár adamǵa alǵys aıtamyz», - dedi Aqtóbe oblysynyń bas ımamy Tólebı Ospan.
Aıta keteıik, osy jolmen 12 aýdannan úı alý josparlanyp otyr. Baspanaǵa muqtaj adamdar týraly aqparat jan-jaqty jınalyp, tek jaǵdaıy qıyn adamdar tańdalady.
Al alǵashqy baspanaǵa qol jetkizgen Ádilbek Rahmetalın alǵysyn aıtyp, balalary úı syılaǵandarǵa arnap óleń arnady.
