Aqtóbede qaıyr suraýshylar jaýapkershilikke tartylyp jatyr
AQTÓBE. QazAqparat - Aqtóbede qaıyr, sadaqa suraýshylar qatary artty. Oblystyq ІІD reıdke shyǵyp, turǵyndardyń mazasyn alǵandardy ákimshilik jaýapkershilikke tartyp jatyr, dep habarlaıdy QazAqparat tilshisi.
Aqtóbede qaıyr-sadaqa suraıtyndar ár juma kúni meshit jaǵalap, bazarlar men halyq kóp shoǵyrlanatyn oryndarda qol jaıyp júr. Turǵyndardan meıirim kútip, «tamaq alýǵa aqsha bershi» dep júrgen adamdar týraly buǵan deıin jazǵan bolatynbyz.
Al, Aqtóbe oblystyq ІІD «Qaıyr suraýshylar» jedel-profılaktıkalyq sharasyn bastady.
«Oblystyq Jergilikti polıtsııa qyzmetiniń 300-den astam qyzmetkeri mobıldi top quryp, adam kóp jınalatyn oryndardy, oıyn-saýyq keshenderiniń jan-jaǵyn, ortalyq kóshelerdi baqylaýǵa aldy. «Qaıyr suraýshylar» aldyn-alý sharasy kezinde qaıyr sadaqa suraýshylar, belgilenbegen orynda taksı qyzmetin usynýshylardy jáne jynystyq sıpattaǵy qyzmet kórsetýshilerdi anyqtady. Olar ákimshilik jaýapkershilikke tartylady»,- dep habarlady oblystyq ІІD baspasóz qyzmeti.
Aıta keteıik, qoǵamdyq oryndarda júrip qaıyr-sadaqa suraýshylar Ákimshilik quqyq buzýshylyq týraly kodekstiń «Qoǵamdyq oryndarda tıisý» baby boıynsha 10 myń teńgeden astam aıyppul tóleıdi.
