Aqtóbede qaıtys bolǵan oqýshynyń eki baýyry da aýrýhanaǵa tústi
AQTÓBE. QazAqparat - Aqtóbede jedel járdem jetkenshe mektep oqýshysy Іnjý Jankına qaza bolǵan edi. Qazir onyń eki baýyry aýrýhanada jatyr, dep habarlaıdy QazAqparat tilshisi.
Aqtóbe qalasyndaǵy balalar klınıkalyq aýrýhanasyna Іnjý Jankınanyń eki baýyry tústi. Qazir 2 jastaǵy Tarǵyn men 4 jastaǵy Nurbaqyt em qabyldap jatyr. Olardyń da aıaq-qoly qurysyp, mazasyndana bastaǵan.
«Balalarym baýyrynyń ólimin óz kózimen kórgen soń kóp jylap júr. Tipti, Nurbaqyt «Іnjýdi alyp kel, ol tiri» dep jıi aıtady, meni jumsaıdy. Aýyryp emhana barǵan kezde bizdi aýrýhanaǵa jiberdi. Qazir balalardyń janynda ákesi bar», - dedi anasy Dınara Baımaǵambetova.
Aýrýhanaǵa «aıaq-qoly qurysady» dep túsken balalar qazir dárigerlerdiń baqylaýyna alyndy. Balalardyń jaǵdaıy - ortasha aýyr.
«Balalarǵa dıagnostıkalyq tekserý júrip jatyr. Aıaq-qoly qurysý belgileri baıqalmaıdy, jaǵdaılary ortasha aýyr. Pedıatr da qarap shyqty. Burynnan qanyazdyq belgileri bar. Kelesi aptada úılerine jiberilýi múmkin. Negizi qurysý belgileriniń sebebi kóp. Ázirge naqty sebebin aıta almaımyz», - dedi aýrýhananyń bas dárigeri Natalıa Golovyrına.
Eske salsaq, 7 jastaǵy Іnjý Jankına jedel járdem jetpeı úıinde kóz jumdy. Keıin oblystyq densaýlyq saqtaý basqarmasy komıssııa quryp, jedel járdemniń kesh jetkenin moıyndady.
