Aqtóbede qaıtarylǵan aktıvter esebinen dárigerlik ambýlatorııa salyndy
ASTANA. KAZINFORM — Aqtóbe oblysynyń Marjanbulaq aýylynda jańa dárigerlik ambýlatorııanyń qurylysy aıaqtaldy, dep habarlaıdy Úkimettiń baspasóz qyzmeti.
Áleýmettik nysan Memleket basshysy Qasym-Jomart Toqaevtyń elge qaıtarylǵan zańsyz ıemdenilgen aktıvter esebinen aýyldyq ınfraqurylymdy damytý jónindegi tapsyrmasyn oryndaý aıasynda boı kóterdi.
Jańa ambýlatorııa aýysymyna 45 kelýshige eseptelgen jáne barlyq qajetti zamanaýı qural-jabdyqtarmen qamtamasyz etilgen. Ǵımaratta patsıentterdi qabyldaýǵa arnalǵan kabınetter, emdeý jáne qaraý bólmeleri qarastyrylǵan, bul turǵyndarǵa sapaly alǵashqy medıtsınalyq-sanıtarııalyq kómek kórsetýge múmkindik beredi.
— Nysannyń qurylysyna Arnaýly memlekettik qordan shamamen 190 mln teńge bólindi. Jumys Prezıdent bastamashylyq etken «Aýylda densaýlyq saqtaýdy jańǵyrtý» ulttyq jobasyn júzege asyrý sheńberinde júrgizildi, — delingen habarlamada.
Aqtóbe oblysynda qaıtarylǵan aktıvter qarajaty esebinen jáne Arnaýly memlekettik qor qarjysynan aýyldyq densaýlyq saqtaý salasynda barlyǵy 11 joba júzege asyrylyp jatyr. Búgingi tańda tórt nysan paıdalanýǵa berildi, jeteýiniń qurylysy jalǵasady.
Osyǵan deıin Kólik mınıstrligi jemqorlardan qaıtarylǵan qarajat qorynan 9,3 mlrd teńge surap otyrǵanyn jazdyq.