Aqtóbede Qaıraqty ózeninen kıikterdiń óleksesi tabyldy
AQTÓBE. KAZINFORM — Bul Áıteke bı aýdanynyń aýmaǵy. Mamandar erteń baryp, mán-jaıdy anyqtaıdy.
Áleýmettik jelide Qaıraqty ózeni jaǵasynda kıikterdiń óleksesi tabylǵany týraly vıdeo tarady. Vıdeoden bir emes, ondaǵan kıiktiń jatqanyn kórýge bolady.
Aqtóbe oblysy boıynsha orman sharýashylyǵy jáne janýarlar dúnıesi aýmaqtyq ınspektsııasynyń basshysy Ádilkereı Áýelbaevtyń aıtýynsha, vıdeony túsirgen adam tabyldy.
— Erteń ınspektsııa basshysynyń orynbasary jáne eki ınspektor, «Ohotzooprom ÓB» RMQK Aqtóbe óńirlik fılıal qyzmetkerleri men jergilikti atqarýshy organ ókilderi de barady. Mán-jaı sol kezde anyqtalady. Qosymsha kómek kerek bolsa Hromtaý aýdanynan da jiberiledi, — dedi Aqtóbe oblysy boıynsha orman sharýashylyǵy jáne janýarlar dúnıesi aýmaqtyq ınspektsııasynyń basshysy Ádilkereı Áýelbaev.
Eske salsaq, bıyl Aqtóbede sharýanyń jerin kıik taptap ketti. Dál osy Áıteke bı aýdanyndaǵy «Qumqudyq» JShS-niń 1200 ga jerin kıik taptaǵany týraly aıtyldy.