Aqtóbede qaıyrymdylyqqa dep jınaǵan aqshany ıemdengen qoǵamdyq qor basshysy sottaldy

AQTÓBE. KAZINFORM – Aqtóbede «More Life» qoǵamdyq qorynyń dırektory 44 mln teńgege jýyq qarjyny ıemdenip, sotta jaýap berýden bas tartty. Sottalýshy 6 jyl 6 aıǵa bas bostandyǵynan aıyryldy.

Aqtóbe qalasynyń № 2 sotynda «More Life» qoǵamdyq qorynyń dırektory Bıbigúl Jýlınaǵa qatysty qylmystyq is qaraldy. Oǵan Qylmystyq kodekstiń «Alaıaqtyq» baby boıynsha aıyp taǵyldy. Іs materıalyna súıensek, «More Life» qoǵamdyq qorynyń dırektory 2022-2024 jyldar aralyǵynda naýqas balalardyń ata-analarynyń shottaryna túsken aqshalaı qarajatty ózine ıemdengen. Shyǵyn kólemi — 43 889 429 teńge. Sot otyrysynda sottalýshy kinásin moıyndamady. Tipti jaýap berýden bas tartty. 

— Jábirlenýshilerdiń, kýágerlerdiń aıǵaqtary, banktik shottardan alynǵan kóshirme sottalýshynyń kánisin dáleldedi. Sot Qylmystyq kodekstiń 190 baby 4 bóligi 2 tarmaǵy negizinde sottalýshyny kináli dep tanyp, 10 jyl merzimge kommertsııalyq jáne kommertsııalyq emes uıymdarda basshy laýazymdardy atqarý quqyǵynan aıyra otyryp, 6 jyl 6 aı merzimge bas bostandyǵynan aıyrý jazasyn taǵaıyndady. Jábirlenýshilerdiń materıaldyq zalal somasyn óndirip alý týraly azamattyq talaptary qanaǵattandyryldy. Sot úkimi zańdy kúshine engen joq, — dep habarlady Aqtóbe qalasy № 2 sotynyń baspasóz qyzmeti. 

Eske salsaq, Aqtóbe oblystyq jolaýshylar kóligi jáne avtomobıl joldary basqarmasynyń burynǵy basshysy Málimbet Ibrashov sottaldy. Oǵan Qylmystyq kodekstiń «Laýazymdyq ókilettilikterdi teris paıdalaný» babymen aıyp taǵyldy.