Aqtóbede qaıyqpen qatynap júrgen aýdanǵa tehnıkalyq kópir salynyp jatyr

AQTÓBE. KAZINFORM — Tehnıkalyq kópir qurylysy 3 kúnde aıaqtalady. Qazir aýdan turǵyndaryn ózen arqyly ótkizýge 5 qaıyq shyǵaryldy.

Aqtóbe oblysy Oıyl aýdanynyń ortalyǵynda turaqty qatynasty qalpyna keltirý úshin tehnıkalyq kópir salynyp jatyr. Tótenshe jaǵdaılar qyzmeti bolsa 3 kúnde 350-ge jýyq adamdy qaıyqpen tasymaldady. 

— Búgingi tańda oblys aýmaǵyndaǵy sý tasqyny jaǵdaıy turaqty. Oıyl aýylynyń kireberisinde kópir salynyp jatyr. Jergilikti atqarýshy organdardyń málimetterine sáıkes tehnıkalyq kópirdiń qurylysyn 3 kún ishinde aıaqtalýy josparlanǵan. Qutqarýshylar ózen arqyly 348 adam, onyń ishinde 49 balany ótkizdi. Oıyl aýylynda 70 adam, 28 tehnıka, 5 júzý quralynan turatyn kúshter jumyldyrylǵan. Turǵyn úıler men saıajaılardy, ǵımarattar men qurylystardy sý basý faktisi tirkelgen joq. Eldimekenderge qaýip joq, — dep habarlady oblystyq TJD baspasóz qyzmeti.

Eske salsaq, 15 naýryz kúni Oıyl aýdanyna kireberistegi ýaqytsha ótkeldi sý shaıdy. Bul aýdandaǵy kópir byltyr tasqynda zaqymdandy. Bıyl saraptama qorytyndysy shyǵyp, qalpyna keltiretin merdiger anyqtaldy.