Aqtóbede qaı sala mamandarynyń jalaqysy joǵary
AQTÓBE. KAZINFORM — Óńirde taý-ken ónerkásibi, kólik jáne qoımalaý, qarjy sektory mamandarynyń jalaqysy joǵary. Al oblystaǵy ortasha jalaqy — 440 520 teńge.
QR Strategııalyq josparlaý jáne reformalar agenttigi Ulttyq statıstıka bıýrosynyń Aqtóbe oblystyq departament basshysy Aıbek Ǵalymjanovtyń aıtýynsha, oblystaǵy ortasha jalaqy 440 520 teńgeni boldy. Ótken jyldyń sáıkes kezeńimen salystyrǵanda 8,7 paıyzǵa ósim bar.
— Eń joǵary ortasha jalaqy taý-ken óndirý ónerkásibinde — 742 740 teńge, kólik jáne qoımalaý salasynda — 641 353 teńge, qarjy sektorynda — 650 823 teńge, — dedi Aıbek Ǵalymjanov.
Al 2026 jyldyń ekinshi toqsanynda jumyssyzdyq deńgeıi 4,6 paıyz boldy, bul degenimiz 20 myńnan astam adam. Jastar arasyndaǵy jumyssyzdyq deńgeıi — 2,4 paıyz.
— Oblysta 489 416 adam — negizgi jumys kúshi. Onyń 95,4 paıyzy, ıaǵnı 467 myńǵa jýyǵy jumyspen qamtylǵan. Jumys oryndaryn ashýmen qatar, olardyń sapasyn arttyrý, kadrdyń suranysqa ıe bolýyn qamtamasyz etý jáne mamandar daıarlaýda ekonomıka suranysyna sáıkestendirý mańyzdy bolyp qala beredi, — dedi QR Strategııalyq josparlaý jáne reformalar agenttigi Ulttyq statıstıka bıýrosynyń Aqtóbe oblystyq departament basshysy Aıbek Ǵalymjanov.
Eske salsaq, Ulttyq ekonomıka mınıstrligi 2019-2026 jyldar aralyǵynda elimizde negizgi áleýmettik tólemder aıtarlyqtaı óskenin málimdedi. Eń tómengi jalaqy (ETJ) 2 ese ósip, 42,5 myń teńgeden 85 myń teńgege deıin ulǵaıdy.
